អភិបាលខេត្តស្វាយរៀង ណែនាំមន្រ្តីឱ្យមាន​សីលធម៌វិជ្ជាជីវៈបម្រើពលរដ្ឋក្នុងមូលដ្ឋាន

ស្វាយរៀង: លោក  ម៉ែន វិបុល អភិបាលខេត្តស្វាយរៀង បានណែនាំដល់មន្រ្តី និងបុគ្គលិកបម្រើការងារនៅការិយាល័យ​ច្រកចេញចូលតែមួយ ត្រូវមានអាកប្បកិរិយា ទន់ភ្លន់ សាមញ្ញ រួសរាយ រាក់ទាក់ ត្រូវប្រកាន់ភ្ជាប់នូវគោលការណ៍ក្រម​សីលធម៌វិជ្ជាជីវៈ ស័ក្ដិសមជាអ្នកផ្ដល់សេវាជូនប្រជាពលរដ្ឋ ។ លើសពីនេះទៀត រដ្ឋបាលស្រុក ត្រូវមានយន្តការត្រួត​ពិនិត្យតាមដានឲ្យបានជាប់ជាប្រចាំ និងគាំទ្រដល់ដំណើរការការិយាល័យច្រកចេញចូលតែមួយ និងការិយាល័យប្រជា​ពលរដ្ឋនៅរដ្ឋបាលស្រុក ដើម្បីធានាថាការផ្តល់សេវារដ្ឋបាលទាំងនេះ ដំណើរការប្រកបដោយតម្លាភាព និងគណ​នេយ្យភាព​ស្របតាមគោលការណ៍បែបបទ និងនីតិវិធីដែលបានកំណត់។

លោកអភិបាលខេត្តថ្លែងបែបនេះ នៅក្នុងពិធីសម្ពោធដាក់ឲ្យដំណើរការការិយាល័យច្រកចេញចូលតែមួយ និងការិយាល័យប្រជាពលរដ្ឋស្រុកកំពង់រោទិ៍ ថ្ងៃទី ០១ ខែ កញ្ញា ឆ្នាំ ២០២២។

លោក ម៉ែន វិបុល ក៏បានផ្ដាំផ្ញើរដល់មន្ទីរជំនាញពាក់ព័ន្ធ សូមបន្តខិតខំជំរុញ និងសម្របសម្រួលពន្លឿនការផ្ទេរសេវា​នានា ដែលនៅសេសសល់មកឲ្យការិយាល័យច្រកចេញចូលតែមួយ នៅសាលាស្រុករួមទាំងការគាំទ្រខាងបច្ចេកទេស និងការកសាងសមត្ថភាពដល់ការផ្តល់សេវាទាំងនេះ ឲ្យកាន់តែមានប្រសិទ្ធភាព ក្នុងនោះ មន្ទីរពាក់ព័ន្ធទាំងអស់ ត្រូវចូលរួមជួយផ្សព្វផ្សាយ និងជំរុញឲ្យប្រជាពលរដ្ឋ ដែលមានមូលដ្ឋាននៅក្នុងស្រុកកំពង់រោទិ៍ មកទទួលសេវា តាមរយៈការិយាល័យច្រកចេញចូលតែមួយស្រុក ដោយមិនត្រូវទទួលពាក្យស្នើសុំសេវានៅមន្ទីរបន្តទៀតនោះទេ បន្ទាប់ពីការិយាល័យនេះបានបើកឲ្យដំណើរការជាផ្លូវការនាពេលនេះ។

ដោយបច្ចុប្បន្នករណីជំងឺកូវីដ-១៩ នៅតែជាបញ្ហាប្រឈមនៅឡើយ ហើយការិយាល័យច្រកចេញតែមួយ ជាកន្លែងផ្ដល់សេវាផ្ទាល់​ជូនប្រជាពលរដ្ឋ ដូច្នេះ រដ្ឋបាលស្រុក ត្រូវចាត់ចែងរៀបចំឲ្យមានជែល ឬអាល់កុល និងម៉ាស សម្រាប់មន្ត្រីរាជការបម្រើការងារក្នុងការិយាល័យច្រកចេញចូលតែមួយប្រើប្រាស់ និងណែនាំឲ្យប្រជាពលរដ្ឋពាក់ម៉ាស និងលាងដៃពេលចេញចូលទទួលសេវានៅក្នុងការិយាល័យច្រក។ នេះជាការបន្ថែមរបស់លោក ម៉ែន វិបុល៕

ដោយ:ភក្ដី