ដោយសារកំហុសមួយ វ៉ាក់សាំងកូវីដជិត៥០០ដូសត្រូវបោះចោលទទេៗ

វាក់សាំងការពារជំងឺកូវីដ១៩របស់ក្រុមហ៊ុន Moderna ជិត៥០០ដូសត្រូវបានបោះចោលនៅឯគ្លិនិកមួយក្នុងរដ្ឋ Wisconsin បន្ទាប់ពីបុគ្គលិកបានទុកប្រអប់ដាក់វ៉ាក់សាំងចំនួន៥០ប្រអប់នៅខាងក្រៅទូរទឹកកកអំឡុងពេលយប់ដែលជាហេតុធ្វើឲ្យវាមិនអាចប្រើប្រាស់បាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យគ្លីនិកសុខភាព Advocate Aurora បានប្រាប់ NBC ថា ការស្តុកទុកមិនត្រឹមត្រូវបានកើតឡើងនៅគ្លីនិក Aurora ក្នុងទីក្រុង Grafton នៃរដ្ឋ Wisconsin កាលពីចុងសប្តាហ៍។ អ្នកនាំពាក្យនិយាយថា ប្រអប់ដាក់វ៉ាក់សាំងត្រូវបានបោះចោលដោយសារតែ “កំហុសមនុស្ស”។

អ្នកនាំពាក្យរូបនេះនិយាយទៀតថា “យើងដឹងថា វ៉ាក់សាំងរបស់ Moderna ប្រហែល៥០ប្រអប់ត្រូវបានយកចេញពីទូទឹកកកឱសថស្ថាននៅពេលយប់។ យើងខកចិត្តនិងសោកស្តាយយ៉ាងខ្លាំងដែលរឿងនេះបានកើតឡើង”។

គួរបញ្ជាក់ថា ប្រអប់នីមួយៗមានផ្ទុកវ៉ាក់សាំងចំនួន១០ដូស។

ទោះបីជាវ៉ាក់សាំងរបស់ក្រុមហ៊ុន Moderna មិនតម្រូវឲ្យដាក់ក្នុងសីតុណ្ហភាពត្រជាក់ខ្លាំងបំផុតដូចវ៉ាក់សាំងរបស់ក្រុមហ៊ុន Pfizer-BioNTech ក៏ដោយក៏វានៅតែតម្រូវឲ្យរក្សាក្នុងសីតុណ្ហភាពទាបចន្លោះដក២៥និងដក១៥អង្សាសេស្រដៀងទៅនឹងវ៉ាក់សាំង Sputnik V របស់រុស្ស៊ីដែរ៕

ប្រែសម្រួលដោយ៖ Vann Vann

ប្រភព៖ RT

ចុចអាន៖ ក្រោយផ្ទុះកូវីដខ្លាំង ថៃបញ្ជាទិញវ៉ាក់សាំងក្រុមហ៊ុន AstraZeneca

ចុចអាន៖ អង់គ្លេសត្រូវចាក់វ៉ាក់សាំងដល់ប្រជាជន ២ លាននាក់ក្នុងមួយសប្តាហ៍ដើម្បីការពារកូវីដរលកទី ៣ និងវីរុសក្លាយពូជថ្មី