សមត្ថកិច្ចរកឃើញទីតាំងល្បែងស៊ីសងខុសច្បាប់១១៦កន្លែងនិងបញ្ជូនមនុស្ស២៥៣នាក់ទៅតុលាការ

នៅក្នុងយុទ្ធនាការបង្ក្រាបល្បែងស៊ីសង ខុសច្បាប់គ្រប់ប្រភេទគិតចាប់ពីថ្ងៃទី ១៨ ខែសីហា ដល់ថ្ងៃទី ០៤ ខែតុលា ឆ្នាំ២០២២ សមត្ថកិច្ចបានបើកប្រតិបត្តិការត្រួតពិនិត្យទីតាំងសង្ស័យបើកល្បែងស៊ីសងខុសច្បាប់គ្រប់ប្រភេទចំនួន ៩៦២២ទីតាំង ក្នុងនោះបានរកឃើញ និងអនុវត្តវិធានការច្បាប់ចំនួន ១១៦ទីតាំង និងលើបុគ្គលចំនួន ២៥៣នាក់ ព្រមទាំងបានកសាងសំណុំរឿងបញ្ជួនទៅតុលាអនុវត្តនីតិវិធីបន្ត។

យោងតាមសេចក្តីប្រកាសព័ត៌មានរបស់គណៈកម្មាធិការប្រយុទ្ធប្រឆាំងនឹងអំពើជួញដូរមនុស្ស របស់រាជរដ្ឋាភិបាល​កម្ពុជាចុះថ្ងៃទី០៧ ខែតុលា ឆ្នាំ២០២២ ស្តីពីការបង្ហាញលទ្ធផលនៃកិច្ចប្រជុំត្រួតពិនិត្យជំហាន​ដំបូងនៃការ​អនុវត្តយុទ្ធនាការ​ប្រយុទ្ធ ប្រឆាំងគប់ទម្រង់នៃអំពើជួញដូរមនុស្ស យុទ្ធនាការបង្ក្រាបល្បែងស៊ីសង ខុសច្បាប់គ្រប់ប្រភេទ ព្រមទាំងយុទ្ធនាការត្រួតពិនិត្យជនបរទស និងហត្ថពលកម្មបរទសបានឱ្យដឹងថា ក្រៅពីអនុវត្តវិធានការច្បាប់អាជ្ញាធរ​និងកងកម្លាំងមានសមត្ថកិច្ចនានាបានចុះធ្វើការផ្សព្វផ្សាយច្បាប់ស្តីពីការបង្ក្រាបល្បែងស៊ីសងនៅតាមមូលដ្ឋានភូមិឃុំសង្កាត់ការផ្សព្វផ្សាយអំពីផលប៉ះពាល់និងល្បែងស៊ីសងខុសច្បាប់ការបន្តតាមដានទីតាំងធ្លាប់ប្រព្រឹត្តល្បែងស៊ីសងការបន្តស្រាវជ្រាវរកទីតាំងដែលនៅតែបន្តប្រព្រឹត្តល្បែងស៊ីសងនិងការបន្តក្តាប់មុខសញ្ញាបើកល្បែងស៊ីសងខុសច្បាប់។

នៅក្នុងសេចក្តីប្រកាសព័ត៍មាននោះ សម្តេចក្រឡាហោមសខេងឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានថ្លែង​អំណរគុណ​និងកោតសរសើរចំពោះ​កិច្ចសហការជិតស្និទ្ធរវាងស្ថាប័នពាក់ព័ន្ធនឹងកិច្ចខិតខំប្រឹងប្រែង​យកចិត្តទុកដាក់​អនុវត្តភារកិច្ចយ៉ាងសកម្មប្រកបដោយការទទួលខុសត្រូវខ្ពស់ពីសំណាក់ក្រុមការងារនិងគណៈបញ្ជាការឯកភាពរដ្ឋបាលរាជធានីខេត្តព្រមទាំងអាជ្ញាធរមានសមត្ថកិច្ចពាក់ព័ន្ធក្នុងការអនុវត្តបេសកកម្មដ៏មានសារសំខាន់នេះ។

ជាមួយនឹងកិច្ចខិតខំប្រឹងប្រែង និងលទ្ធផលដែលសម្រេចបានក្នុងរយៈពេលនេះ សម្ដេចក្រឡាហោម ស ខេង បានជំរុញដល់ស្ថាប័ណ្ណពាក់ព័ន្ធអាជ្ញាធរមានសមត្ថកិច្ច រដ្ឋបាលរាជធានីខេត្ត គណបញ្ជាការដឹកនាំប្រតិបត្តិការ ត្រូវបន្តជំរុញអនុវត្តការងារសំខាន់បន្ថែមទៀតរួមមានបន្តស្រាវជ្រាវ និងពិនិត្យសំណើថ្មីៗ ព្រមទាំងករណី​ដែលនៅសេសសល់ដើម្បីសង្គ្រោះជនរងគ្រោះរកជនសង្ស័យ និងជនល្មើសរត់គេចខ្លួនមកផ្ដន្ទាទោសតាមច្បាប់​និងបង្ការទប់ស្កាត់មិនឲ្យជនទាំងនោះបង្កអសន្តិសុខនៅក្នុងសង្គម៕ សំអឿន