ស្ងាត់បាញ់មីស៊ីល, កូរ៉េខាងជើង ប្រារព្ធខួបបង្កើតគណបក្សពលករ

ប្រជាជនកូរ៉េខាងជើងបានប្រារព្ធខួបនៃការបង្កើតគណបក្សពលករដែលកំពុងកាន់អំណាចកាលពីថ្ងៃចន្ទ បន្ទាប់ពីប្រទេសនេះបានបាញ់មីស៊ីលផ្ទួនៗក្រោមការដឹកនាំរបស់លោក គីម ជុងអ៊ុន ។

ប្រជាជនកូរ៉េខាងជើងបានចូលរួមនៅក្នុងព្រឹត្តិការណ៍រាំដ៏ធំមួយក្នុងការប្រារព្ធខួប ៧៧ ឆ្នាំ ចាប់តាំងពីគណបក្សកាន់អំណាចរបស់កូរ៉េខាងជើងត្រូវបានបង្កើតឡើង ក្រោយការបាញ់មីស៊ីលផ្លោងជាបន្តបន្ទាប់នៅក្នុង​សមយុទ្ធ​នុយក្លេអ៊ែរ​យុទ្ធសាស្ត្រ​ក្នុងរយៈពេលប៉ុន្មានសប្តាហ៍កន្លងមកនេះ ។

ទីភ្នាក់ងារសារព័ត៌មានរដ្ឋ KCNA បានរាយការណ៍កាលពីថ្ងៃចន្ទថា ការបាញ់មីស៊ីលរបស់អង្គភាពប្រតិបត្តិការនុយក្លេអ៊ែរដែលដឹកនាំដោយលោក គីម ជុងអ៊ុន ធ្វើឡើង ដើម្បីឆ្លើយតបទៅនឹងសមយុទ្ធកងទ័ពជើងទឹកទ្រង់ទ្រាយធំ របស់កងកម្លាំងកូរ៉េខាងត្បូង និងសហរដ្ឋអាមេរិក ដែលបានបង្កើនភាពតានតឹងយ៉ាងខ្លាំងនៅក្នុងតំបន់ ។

ពាក់ព័ន្ធនឹងបញ្ហានេះ ប្រធានាធិបតីកូរ៉េខាងត្បូងលោក Yoon Suk-yeol បានរិះគន់យ៉ាងខ្លាំងចំពោះទង្វើថ្មីៗរបស់កូរ៉េខាងជើង ។ លោក Yoon បាននិយាយថា “កូរ៉េខាងជើងកំពុងអភិវឌ្ឍ និងជំរុញអាវុធនុយក្លេអ៊ែររបស់ខ្លួនជាលំដាប់ ដោយគំរាមកំហែងមិនត្រឹមតែកូរ៉េខាងត្បូងប៉ុណ្ណោះទេ ប៉ុន្តែថែមទាំងពិភពលោកទាំងមូលតែម្ដង” ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កូរ៉េខាងជើង បញ្ជាក់ច្បាស់ៗ ពាក់ព័ន្ធការបាញ់មីស៊ីលឥតល្ហែ នាពេលថ្មីៗនេះ