អាជ្ញាធរខណ្ឌច្បារអំពៅ​ណែនាំម្ចាស់​អាជីវកម្មទិញ-លក់អេតចាយគ្រប់ប្រភេទឲ្យមានសណ្ដាប់ធ្នាប់

លោក ចេង មុនីរ៉ា អភិបាលនៃគណៈអភិបាលខណ្ឌច្បារអំពៅនៅព្រឹកថ្ងៃពុធ ទី១៦ ខែវិច្ឆិកា ឆ្នាំ២០២២ បានប្រជុំណែនាំម្ចាស់អាជីវកម្មទិញ-លក់អេតចាយគ្រប់ប្រភេទ​នៅក្នុងមូលដ្ឋាន​ខណ្ឌច្បារអំពៅត្រូវរៀបចំឲ្យមានសណ្តាប់ធ្នាប់របៀបរៀបរយ មិនត្រូវស្តុកសម្ភាររបស់ខ្លួនលើចិញ្ចើមផ្លូវ និងទ្រូងផ្លូវសាធារណៈជាដាច់ខាត។

លោកអភិបាលខណ្ឌក៏ពាវនាវដល់ម្ចាស់អាជីវកម្មកុំធ្វើអ្វីប៉ះពាល់ដល់អ្នកជិតខាង រំខានដល់ការរស់នៅរបស់អ្នកជិតខាង ដូចជាការបង្កសំឡេងឮខ្លាំងៗ ឬការបង្កក្លិនស្អុយ។

គោលការផេ្សងទៀតដូជា ម្ចាស់អាជីវកម្ម មិនត្រូវទិញគ្រឿងយុទ្ធភ័ណ្ឌមិនទាន់ផ្ទុះគ្រប់ប្រភេទ ប៉ុន្តែត្រូវរាយការណ៍​មកអាជ្ញាធរមូលដ្ឋាន ដើម្បីប្រគល់ជូនសុីម៉ាក់។ ហើយរាល់ការដឹកជញ្ជូនមិនត្រូវដឹកសំពីងសំពោងឡើយ។ ចំពោះអ្នកបើកបរត្រូវមានប័ណ្ណបើកបរត្រឹមត្រូវ បើកបរដោយមានសីលធម៌។

លោកអភិបាលខណ្ឌបានបញ្ជាក់ថា ម្ចាស់អាជីវកម្មត្រូវអប់រំណែនាំបុគ្គលិក និងកម្មកររបស់ខ្លួន មិនឲ្យមានជាប់ពាក់ព័ន្ធជាមួយគ្រឿងញៀនឡើយ និងមិនឲ្យប្រព្រឹត្តល្បែងសុីសងគ្រប់ប្រភេទ។

ចំពោះមូលដ្ឋានអាជីវកម្ម ដែលពុំទាន់មានលិខិតអនុញ្ញាត ត្រូវស្នើសុំលិខិតអនុញ្ញាតប្រកបអាជីវកម្មឲ្យស្របតាមច្បាប់និងលិខិតបទដ្ឋានគតិយុត្តដែលមានជាធរមាន។

រដ្ឋបាលខណ្ឌទុករយៈពេល១០ថ្ងៃ គិតចាប់ពីថ្ងៃប្រជុំណែនាំនេះតទៅដើម្បីឲ្យបងប្អូន​ម្ចាស់អាជីវកម្ម ដាក់ពាក្យស្នើសុំលិខិតអនុញ្ញាតប្រកបអាជីវកម្ម៕

អត្ថបទ៖ នរា