តើសិទ្ធិអ្នកនិពន្ធ និងសិទ្ធិប្រហាក់ប្រហែលមានខ្លឹមសារដូចម្តេច?

សិទ្ធិអ្នកនិពន្ធស្ថិតនៅក្រោមច្បាប់កម្មសិទ្ធិបញ្ញា ឬ IP។ សិទ្ធិអ្នកនិពន្ធ គឺជាសិទ្ធិដែលច្បាប់ផ្តល់ជូនដល់អ្នកនិពន្ធ តន្រ្តីករ អ្នកសិល្បៈ ឬ អ្នកបង្កើតស្នាដៃនានា ប្រើប្រាស់ស្នាដៃរបស់ខ្លួនដោយស្របច្បាប់ និងការពារពីការលួចចម្លងផ្សេងៗ ឬយកទៅប្រើប្រាស់ដោយខុសច្បាប់។

លោក ថេង សុវណ្ណារីហ្សា (Sam Rocker) តន្ត្រីករមួយ​រូប​បានលើកឡើងថា សិទ្ធិអ្នកនិពន្ធបែងចែកជា ២ ប្រភេទ គឺសិទ្ធិសីលធម៌ និងសិទ្ធិបេតិកភណ្ឌ។ សិទ្ធិសីលធម៌មិនមានការផុតកំណត់​ការពារឡើយ ទោះបីម្ចាស់ដើម​ទទួលមរណភាពទៅហើយក្តី ក៏អ្នកស្នងមរតកមានសិទ្ធិទាមទារឱ្យមានការគោរពសិទ្ធិស្នាដៃផងដែរ។ ក្នុងករណីមិនមានអ្នកស្នងមរតក ឬ មិនបានជ្រើសរើសអ្នកស្នងមរតក ក្រសួងវប្បធម៌ និងវិចិត្រសិល្បៈនឹងដើរតួនាទីការពារសិទ្ធិនេះជូនម្ចាស់ស្នាដៃ។

រីឯសិទ្ធិបេតិកភណ្ឌវិញ ពោលប្រសិនជានរណាម្នាក់មានបំណងចង់រកកម្រៃដោយប្រើបទចម្រៀងម្ចាស់​ដើម ទាល់តែមានការយល់ព្រមជាមុនសិន។ មួយវិញទៀត ក្នុងករណីនេះម្ចាស់ដើម​ក៏​ទទួលបានប្រាក់កម្រៃមួយចំណែកផងដែរ។ សិទ្ធិបេតិកភណ្ឌមានរយៈពេលកំណត់ ៥០ ឆ្នាំ។

ចំពោះសិទ្ធិប្រហាក់ប្រហែលវិញ លោក ស៊ឹម សត្តា ប្រធាននាយកដ្ឋានសិទ្ធិអ្នកនិពន្ធ និងសិទ្ធិប្រហាក់ប្រហែលបានលើកឡើងថា គឺសំដៅដល់ច្បាប់ការពារលើសិទ្ធិអ្នកសម្តែង សិទ្ធិផលិតកររូបភាព និងអង្គភាពផ្នែកទូរទស្សន៍ ឬ វិទ្យុជាដើម។ ទាំងបីនេះ ត្រូវបានគេចាត់ទុកថាជាសិទ្ធិប្រហាក់ប្រហែល។

លោក ស៊ឹម សត្តា បាន​ក្រើន​រំលឹកដល់​អ្នកនិពន្ធដែល​ចង់ឱ្យស្នាដៃរបស់ខ្លួន ត្រូវបានការពារពីការលួចចម្លងផ្សេងៗ គួរធ្វើការចុះបញ្ជីកម្មសិទ្ធិបញ្ញាឱ្យបានត្រឹមត្រូវតាមច្បាប់។ ការចុះបញ្ជីកម្មសិទ្ធិបញ្ញានេះមានជាច្រើនស្នាដៃ ដូចជាស្នាដៃចម្រៀង ស្នាដៃអក្សរសាស្ត្រ ស្នាដៃភាពយន្ត និងស្នាដៃសិល្បៈផ្សេងទៀត​៕

ដោយ៖ អុន ស្រីមាន