ទំហំជួញដូរផ្សារភាគហ៊ុននៅកម្ពុជា កើនឡើង ៦៦ម៉ឺនដុល្លារ ក្នុងមួយថ្ងៃ

លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា បានមានប្រសាសន៍ថា ទំហំជួញដូរនៃផ្សារភាគហ៊ុននៅកម្ពុជា បានកើនឡើងដល់៦៦ម៉ឺនដុល្លារអាមេរិក ក្នុងមួយថ្ងៃ ដែលបង្ហាញថា ទីផ្សារមូលបត្រនៅកម្ពុជាកំពុងវិវឌ្ឍន៍ប្រកបដោយវឌ្ឍនភាពជាវិជ្ជមាន។

ថ្លែងក្នុងពិធីចុះកិច្ចព្រមព្រៀងស្ដីពីការប្រើប្រាស់សេវាទូទាត់ប្រាក់តាមប្រព័ន្ធអេឡិចត្រូនិចសម្រាប់ការបង់ថ្លៃសេវាស្នើសុំលេខអត្តសញ្ញាណវិនិយោគិនតាមអនឡាញ នៅថ្ងៃទី០៧ធ្នូ លោកស៊ូ សុជាតិ បានបន្តថា ទំហំជួញដូរភាគហ៊ុន ក្នុងឆ្នាំ២០២២ គិតត្រឹមត្រីមាសទី៣ ជាមធ្យមប្រហែល ២៦៦.២៨៩ ភាគហ៊ុន និងមានតម្លៃជួញដូរជាមធ្យមប្រហែល ៦៦ម៉ឺនដុល្លារអាមេរិកក្នុងមួយថ្ងៃ។

លោកបានបន្តថាដូច្នេះថា ទីផ្សារមូលបត្រកំពុងវិវឌ្ឍន៍ប្រកបដោយវឌ្ឍនភាពជាវិជ្ជមាន ដោយទីផ្សាររបស់យើង​មានប្រព័ន្ធ​ទ្រទ្រង់ ឬសសរស្តម្ភគ្រប់គ្រាន់ (វិនិយោគិន, ក្រុមហ៊ុនបោះផ្សាយ, អន្តរការីទីផ្សារ និងហេដ្ឋា​រចនាសម្ព័ន្ធទីផ្សារ) និងទទួលបានការគាំទ្រ និងការចូលរួមយ៉ាងពេញទំហឹងពីភាគីពាក់ព័ន្ធទាំងអស់នៅក្នុងវិស័យនេះ។

លោក ហុង សុហួរ ប្រតិភូរាជរដ្ឋាភិបាល ទទួលបន្ទុកអគ្គនាយកនៃក្រុមហ៊ុនផ្សារមូលបត្រកម្ពុជា អះអាងកាល​ពីចុងសប្តាហ៍នេះថា កាលមុនផ្ទុះឡើងនូវជំងឺកូវីដ-១៩ ពោលគឺ នៅឆ្នាំ២០១៩ ទំហំជួញដូរនៃផ្សារមូលបត្រកម្ពុជា ស្ថិតក្នុងរង្វង់១៥-១៦ម៉ឺនដុល្លារ ក្នុងមួយថ្ងៃ ប៉ុន្តែដោយសារជំងឺកូវីដ-១ ៩នៅឆ្នាំ២០២០ បានធ្លាក់ចុះមកនៅ​ត្រឹមខ្ទង់១១ម៉ឺនដុល្លារ ក្នុងមួយថ្ងៃ។ ទោះជាយ៉ាងនេះក្តី ដោយសារការចេះរៀនរស់ជាមួយជំងឺកូវីដ-១៩ បានធ្វើ​ឱ្យទីផ្សារភាគហ៊ុនរបស់កម្ពុជា នៅឆ្នាំ២០២១ ចាប់ផ្តើមកើនឡើងវិញ ក្នុងចំនួនជួញដូរជាមធ្យម២៧ម៉ឺនដុល្លារ ក្នុងមួយថ្ងៃ។

លោក ស៊ូ សុជាតិ បានបញ្ជាក់ថា នៅចុងត្រីមាសទី៣ ឆ្នាំ២០២២ និយ័តករមូលបត្រកម្ពុជាបានផ្តល់លេខអត្តសញ្ញាណ​វិនិយោគិនសរុបចំនួន ៣៣.១៨២ ក្នុងនោះវិនិយោគិនជារូបវន្តបុគ្គលមានចំនួន ៩៩.៥២ % និងវិនិយោគិនសញ្ជាតិខ្មែរ​មានចំនួន ៨៦.២៣%។ ចំណែកទំហំមូលធនូបនីយកម្មទីផ្សារសរុបនៃទីផ្សារមូលបត្រកម្មសិទ្ធិមានតម្លៃប្រហែល ៧,១៩ ទ្រីលានរៀល (ប្រហែល ១,៧៥ ប៊ីលានដុល្លារអាមេរិក)។

លោក ស៊ូ សុជាតិ បាន​បញ្ជាក់​ថា រហូត​មក​ដល់​ពេលនេះ កម្ពុជា មាន​ក្រុមហ៊ុន​ចុះបញ្ជី​ក្នុង​ទីផ្សារ​មូលបត្រ​ចំនួន ១៦ ក្រុមហ៊ុន ក្នុង​នោះ​មាន​ក្រុមហ៊ុន​ចុះបញ្ជី​ផ្នែក​មូលបត្រ​កម្មសិទ្ធិ​ចំនួន ៩ ក្រុមហ៊ុន និង​ក្រុមហ៊ុន​ចុះបញ្ជី​ផ្នែក​មូលបត្រ​បំណុល​ចំនួន ៧ ក្រុមហ៊ុន៕

អត្ថបទ៖ សំអឿន