លោក យ៉ង សាំងកុមារ៖ កសិករភាគច្រើន​បំផុត​ចំណាយខ្ទង់ ៤០ម៉ឺនរៀលជួលម៉ាស៊ីន​ច្រូតស្រូវក្នុងមួយហិកតា

លោក យ៉ង សាំងកុមារ រដ្ឋលេខាធិការក្រសួងកសិកម្ម បានលើកឡើងថា កសិករភាគច្រើនបំផុតជួលម៉ាស៊ីច្រូត​ស្រូវដែលត្រូវចំណាយពី ៣៨ -៤០ម៉ឺនរៀល ក្នុងមួយហិកតា។ ការចំណាយលើថ្លៃច្រូត១គីឡូស្រូវអាស្រ័យ​លើទិន្នផលស្រូវ មានន័យថាបើស្រូវបានផលកាន់តែខ្ពស់ការចំណាយលើថ្លៃច្រូតកាន់តែទាប បើទិន្នផលកាន់តែទាប ការចំណាយលើថ្លៃច្រូតក្នុងមួយគីឡូកាន់តែខ្ពស់។ លោកលើកឡើងបែបនេះ នៅលើបណ្តាញហ្វេសប៊ុក​ផ្លូវការនៅរសៀលថ្ងៃទី ០៨ ខែ ធ្នូ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្ថែមទៀតថា ការប្រើប្រាស់គ្រឿងចក្រសម្រាប់ភ្ជួរ និងច្រូតអាចជួយដោះស្រាយបញ្ហាពលកម្មតែបើផល​ស្រូវទាបវានឹងធ្វើឲ្យថ្លៃដើមកាន់តែខ្ពស់ ដែលជាបន្ទុកកាន់តែធ្ងន់វិញសម្រាប់កសិករ។

លោកលើកឡើងដូច្នេះថា« ខ្ញុំយល់ថាការប្រើប្រាស់គ្រឿងយន្ត ដោយកសិករគួរតែផ្សាភ្ជាប់ជាមួយវិធានការបង្កើនទិន្នផល​ដូចជាការ​ប្រើពូជល្អ ការប្រើជីឲ្យបានល្អ ការពង្រាបដី និងការគ្រប់គ្រងទឹកដើម្បីកាត់បន្ថយថ្លៃដើមផលិតស្រូវ»។

សូមបញ្ជាក់ថា លោក យ៉ង សាំងកុមារ ត្រូវបានព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ត្រាស់បង្គាប់តែងតាំងមុនតំណែង ជារដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការ ក្រសួងកសិកម្ម នៅថ្ងៃទី ២៩ ខែ វិច្ឆិកា ឆ្នាំ ២០២២ កន្លងទៅ៕