រដ្ឋាភិបាលដំឡើងប្រាក់បំណាច់មុខងារដល់អភិបាលរាជធានី-ខេត្ត ចំនួន ១លាន ១៣ ម៉ឺនរៀល

តាមអនុក្រឹត្យលេខ០៤ អនក្រ.បក ចុះនៅថ្ងៃទី០៤ ខែមករា ឆ្នាំ២០២៣ របស់រាជរដ្ឋាភិបាលកម្ពុជា ស្តីពី ការកែប្រែ និងការដំឡើងប្រាក់បំណាច់មុខងារមន្ត្រីរាជការស៊ីវិល បានដំឡើងប្រាក់បំណាច់អភិបាលរាជធានី-ខេត្ត ចំនួន ១លាន ១៣ម៉ឺនរៀល។

តាមអនុក្រឹត្យលេខ០៤ អនក្រ.បក ប្រាក់បំណាច់មុខងារមន្រ្តីរាជការស៊ីវិល ត្រូវបានកែប្រែ និងដំឡើងដូចជា ក្នុងវិស័យរដ្ឋបាល កាទូត និងបច្ចេកទេស, វិស័យអប់រំ​, វិស័យសុខាភិបាល និងវិស័យអប់រំ។ ក្នុងនោះ វិស័យរដ្ឋបាល កាទូត និងបច្ចេកទេស មានចែកតាមថ្នាក់ជាតិ និងថ្នាក់ក្រោមជាតិ ដោយថ្នាក់ជាតិ ត្រូវបានដំឡើង និងកែប្រែចាប់ពី ១២លានរៀល ដល់ ៦៣៧,៥០០៛ សម្រាប់ ១៣៧តួនាទី។

សម្រាប់ថ្នាក់ក្រោមជាតិ រដ្ឋាភិបាលបានដំឡើង និងកែប្រែ ប្រាក់បំណាច់មុខងារមន្រ្តីរាជការស៊ីវិល ចំនួន ១លាន ១៣ម៉ឺនរៀល ដល់ ៦៣៧,៥០០៛ សម្រាប់ ៥១តួនាទី។ ចំពោះវិស័យអប់រំបានបែងចែកជាវិស័យអប់រំទូទៅ និងពិសេស។ វិស័យអប់រំទូទៅ ប្រាក់បំណាច់មុខងារមន្រ្តីរាជការស៊ីវិល ត្រូវបានកែប្រែ និងដំឡើង ចាប់ពី ១,៩៣០,០០០៛ ដល់ ៦៨៧,៥០០៛ សម្រាប់ ១៨៤តួនាទី។

រីឯ ប្រាក់បំណាច់មុខងារផ្នែកអប់រំពិសេស មានចំនួន ១លាន ៨សែនរៀល ដល់ ១,៣៨០,០០០៛ សម្រាប់ ១២តួនាទី។សម្រាប់ប្រាក់បំណាច់មុខងារ ក្នុងវិស័យសុខាភិបាល ១,១៣០,០០០៛ ដល់ ៦៣៧,៥០០៛ សម្រាប់ ៧០តួនាទី។ វិស័យចុងក្រោយគឺ វិស័យយុត្តិធម៌ ត្រូវបានដំឡើង និងកែប្រែប្រាក់ ចាប់ពី ១,៩៣០,០០០៛ ដល់ ៧០៧,៥០០៛ ក្នុង ៣៦តួនាទី៕

ដោយ៖ អុន ស្រីមាន