អភិបាលខេត្តកណ្ដាល សុំឲ្យពលរដ្ឋ មន្ត្រីរាជការ ជឿជាក់ លើរដ្ឋាភិបាលក្នុងការដោះស្រាយបញ្ហា តាមវិធានការច្បាប់អន្តរជាតិ និងការទូត

លោក គួច ចំរើន អភិបាលខេត្តកណ្ដាល នៃ គណៈអភិបាលខេត្តកណ្ដាល សូមឱ្យកងកម្លាំងប្រដាប់អាវុធ មន្ត្រីរាជការ និងប្រជាពលរដ្ឋទាំងអស់ សូមជឿជាក់លើការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការការពារទឹកដី ប្រជាជនរបស់យើង និងការការពារផលប្រយោជន៍ធំបំផុតសម្រាប់ប្រទេសកម្ពុជារបស់យើង។ លោក គួច ចំរើន អភិបាល មានប្រសាសន៍ដូច្នេះ នៅក្នុងទិវាជាតិបង្ការនិងពន្លត់អគ្គីភ័យ លើកទី០៧ កាលពីនារសៀលថ្ងៃទី២២ ខែកុម្ភៈ ឆ្នាំ២០២៦ នៅសួនច្បារច្រមុះជ្រូក ក្រុងតាខ្មៅ ខេត្តកណ្ដាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អភិបាលខេត្តកណ្ដាលបានបន្តថា៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដឹកនាំប្រតិភូ ចូលរួមកិច្ចប្រជុំលើកដំបូង របស់ក្រុមប្រឹក្សាសន្តិភាព ដែលបង្កើតឡើងដោយលោកប្រធានាធិបតីសហរដ្ឋអាមេរិក ដូណាល់ ត្រាំ ដោយសម្ដេចបាននាំយកបញ្ហាយោធាថៃ រំលោភឈ្លានពានទាំងកំរោលនៅលើទឹកដីកម្ពុជា ទៅផ្សព្វផ្សាយនៅទូទាំងពិភពលោក ដោយបានផ្ដល់កិច្ចសម្ភាសន៍ជាមួយសារព័ត៌មានអន្តរជាតិ Reuters របស់អង់គ្លេស និងFox News របស់អាមេរិក ហើយមកដល់ពេលនេះសារព័ត៌មានអន្តរជាតិធំៗនៅលើពិភពលោក បានធ្វើការផ្សព្វផ្សាយអំពីការឈ្លានពានរបស់ថៃមកលើកម្ពុជាយើង។

លោកអភិបាលខេត្ត បន្ថែមថា៖ រាជរដ្ឋាភិបាលក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានធ្វើការគិតគូរ ដោះស្រាយបញ្ហាជាតិ និងអធិបតេយ្យជាតិ ដោយប្រកាន់យកនូវគោលជំហរផលប៉ះពាល់តូចបំផុត ជាជម្រើសដែលកម្ពុជាប្រកាន់យក ហើយកម្ពុជាប្រកាន់យកគោលការណ៍សន្តិភាព ក្នុងការដោះស្រាយដោយប្រើប្រាស់វិធានការច្បាប់អន្តរជាតិ និងការទូត។

លោកបានបន្ថែមទៀតថា៖ យើងមិនអាចប្រើប្រាស់សង្គ្រាម ដើម្បីបញ្ចប់សង្គ្រាមបាននោះទេ ប៉ុន្តែប្រសិនបើយើងខិតខំដោះស្រាយដោយវិធានការច្បាប់អន្តរជាតិ និងការទូត ហើយនៅពេលដែលមានការព្រមព្រៀងបញ្ចប់សង្គ្រាម នោះយើងនឹងទទួលបានសុខសន្តិភាពជាអចិន្ត្រៃយ៍បាន សម្រាប់ប្រទេសរបស់យើង។ ដូចនេះបានជារាជរដ្ឋាភិបាលរបស់យើង បានសម្រេចយកការដោះស្រាយដោយច្បាប់អន្តរជាតិ និងការទូត ដែលសម្ដេចមហាបវរធិបតី កំពុងបន្តការដឹកនាំប្រតិភូទៅបំពេញនៅសហរដ្ឋអាមេរិក និងបណ្ដាប្រទេសអឺរ៉ុបមួយចំនួន។

ដូចនេះសូមកងកម្លាំងប្រដាប់អាវុធ មន្ត្រីរាជការ និងប្រជាពលរដ្ឋទាំងអស់ សូមជឿជាក់លើការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការការពារទឹកដី ប្រជាជនរបស់យើង និងការការពារផលប្រយោជន៍ធំបំផុតសម្រាប់ប្រទេសកម្ពុជារបស់យើង៕