សម្ដេចតេជោ ហ៊ុន សែន ស្នើលោក ស៊ី ជិនពីង ជំរុញអ្នកទេសចរណណ៍ចិន មកទស្សនាកម្ពុជាឲ្យកាន់ច្រើនឡើង

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានស្នើដល់លោក ស៊ី ជិនពីង ប្រធានាធិបតីចិន ជួយជំរុញអ្នកទេសចរណណ៍ចិន មកទស្សនាកម្ពុជាឲ្យកាន់ច្រើនឡើងបន្ថែមទៀត។ ការស្នើនេះ ធ្វើឡើងនៅថ្ងៃទី ១០ ខែកុម្ភៈ ឆ្នាំ ២០២៣នេះ គ្រាដែលសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានអញ្ជើញជួបសម្ដែងការគួរសមជាមួយលោក ស៊ី ជិនពីង ប្រធានាធិបតីចិន។

នៅក្នុងជំនួបនេះ សម្តេចតេជោ ហ៊ុន សែន បានស្នើដល់លោកប្រធានាធិបតី ស៊ី ជិនពីង ជំរុញអ្នកទេសចរណណ៍ចិន មកទស្សនាកម្ពុជាឲ្យកាន់ច្រើនឡើង បន្ទាប់ពីការបន្ធូរបន្ថយការរឹតត្បិតរបស់ប្រទេសចិន ជាពិសេសការលើកទឹកចិត្តពីលោកប្រធានាធិបតី ដើម្បីឲ្យអ្នកទេសចរណ៍ចិនធ្វើដំណើរមកកាន់កម្ពុជា ដោយគ្មានការភ័យខ្លាច។

ជាមួយគ្នានេះសម្តេចតេជោ ហ៊ុន សែន មានប្រសាសន៍សង្កត់ធ្ងន់ថា សេដ្ឋកិច្ចកម្ពុជាងើបឈរឡើងវិញ គឺដោយសារកាយវិការ និងការជួយឧបត្ថម្ភរបស់ប្រទេសចិន ក្នុងការផ្តល់វ៉ាក់សាំងបង្ការជំងឺកូវីដ-១៩ ពោលបើមិនមានវ៉ាក់សាំងចាក់ស្រោចទូទាំងប្រទេសកម្ពុជា ដែលផ្តល់ដោយភាគីចិនទេនោះ មិនដឹងថា ប្រជាជនកម្ពុជាមានវាសនាបែបណានោះទេ ពិសេសកម្ពុជាបានបើកសេដ្ឋកិច្ច និងប្រទេសឡើងវិញ កាលពីថ្ងៃទី ១ ខែវច្ឆិកា ឆ្នាំ ២០២១កន្លងទៅនេះ។

គួររំលឹកថា ប្រទេសកម្ពុជា បានរៀបចំការទទួលស្វាគមន៍ចំពោះភ្ញៀវទេសចរចិន ១២៥នាក់ ដែលមកពីទីក្រុងប៉េកាំង នៅអាកាសយានដ្ឋានអន្តរជាតិភ្នំពេញ កាលពីថ្ងៃទី ៧ ខែកុម្ភៈ ឆ្នាំ ២០២៣ ដែលនេះជាជើងហោះហើរពីប៉េកាំង មកភ្នំពេញឡើងវិញលើកទី ១ ក្រោយរដ្ឋាភិបាលចិន បើកឲ្យប្រជាជនធ្វើដំណើរចេញក្រៅប្រទេសឡើងវិញ ចាប់ពីថ្ងៃទី ៨ ខែមករា ឆ្នាំ ២០២៣មក។ ការទទួលស្វាគមន៍នេះ រៀបចំដោយក្រសួងទេសចរណ៍ រដ្ឋលេខាធិការដ្ឋានអាកាសចរណ៍ស៊ីវិល ក្រុមហ៊ុនគ្រប់គ្រងអាកាសយានដ្ឋានកម្ពុជា សមាគមទេសចរណ៍កម្ពុជា និងស្ថានទូតចិនប្រចាំកម្ពុជា៕