ព័ត៌មានអន្ដរជាតិ

ចិន ត្រៀមខ្លួនបង្កើនកិច្ចសហប្រតិបត្តិការយោធាជាមួយ រុស្ស៊ី (មានវីដេអូ)

បានផុស

២ years មុន

នៅ

ថ្ងៃសុក្រ ៣១ មីនា ២០២៣

ដោយ

អ្នកនាំពាក្យក្រសួងការពារជាតិចិន លោក Tan Kefei បាននិយាយកាលពីថ្ងៃព្រហស្បតិ៍ទី៣០ថា ប្រទេសចិន បានត្រៀមខ្លួនរួចជាស្រេច ក្នុងការពង្រឹងកិច្ចសហប្រតិបត្តិការជាមួយយោធារុស្ស៊ី ដើម្បីរួមគ្នាលើកកម្ពស់យុត្តិធម៌ សន្តិភាព និងសន្តិសុខអន្តរជាតិ។

សេចក្តីប្រកាសនេះធ្វើឡើង បន្ទាប់ពីកិច្ចប្រជុំកំពូលរវាងលោកប្រធានាធិបតី ស៊ី ជីនពីង និងសមភាគីរុស្ស៊ីលោក វ្ល៉ាឌីមៀរ ពូទីន នៅទីក្រុងមូស្គូកាលពីដើមខែនេះ។

មេដឹកនាំទាំងពីរ បានអះអាងសាជាថ្មី នូវគោលការណ៍នៃភាពជាដៃគូរវាងប្រជាជាតិទាំងពីរ ហើយបានយល់ព្រម ធ្វើឲ្យប្រសើរឡើងនូវទំនាក់ទំនងទ្វេភាគី និងការសម្របសម្រួលផ្នែកយោធា។

យោងតាមលោក Tan, ប្រទេសចិនមានឆន្ទៈធ្វើការរួមគ្នាជាមួយយោធារុស្ស៊ី ដើម្បីអនុវត្តឲ្យបានពេញលេញនូវការឯកភាពដ៏សំខាន់ដែលប្រមុខរដ្ឋទាំងពីរបានព្រមព្រៀងគ្នា។ លោកបន្ថែមថា កិច្ចព្រមព្រៀងនោះ រួមបញ្ចូលទាំងការពង្រឹងទំនាក់ទំនងជាយុទ្ធសាស្រ្ត និងការសម្របសម្រួលបន្ថែមទៀតផងដែរ។

អ្នកនាំពាក្យខាងលើបន្តថា ប្រទេសទាំងពីរនឹងរៀបចំជាទៀងទាត់នូវការល្បាតដែនសមុទ្រ និងដែនអាកាសរួម ក៏ដូចជាការធ្វើសមយុទ្ធហ្វឹកហ្វឺន និងពង្រឹងកិច្ចសហប្រតិបត្តិការលើវិស័យផ្សេងៗជាច្រើនទៀតផងដែរ។ គោលបំណងធំរបស់ចិន គឺការពង្រឹងទំនុកចិត្តគ្នាទៅវិញទៅមកខាងយោធាជាមួយរុស្ស៊ី ដើម្បីជួយធានាយុត្តិធម៌អន្តរជាតិ និងរួមចំណែកថ្មីដល់សន្តិសុខអន្តរជាតិ និងតំបន់។

យ៉ាងណាក្តី ទន្ទឹមនោះ សហរដ្ឋអាមេរិកបានហៅទំនាក់ទំនងដែលកំពុងស្អិតរមួតរវាងរុស្ស៊ី និងចិនថាជាបញ្ហាដ៏ធំ។ ក្រុមមន្ត្រីអាមេរិក ក៏បានចាត់ទុកប្រទេសចិនថាជា “បញ្ហាប្រឈម” ផងដែរ ខណៈមន្ទីរបញ្ចកោណបានស្នើសុំថវិកាការពារជាតិឆ្នាំ២០២៤ ឡើងរហូតដល់៨៤២ពាន់លានដុល្លារ ដើម្បីទប់ទល់នឹងទីក្រុងប៉េកាំង៕

សូមទស្សនាវីដេអូ៖