បងស្រីប្រធានាធិបតី ហ្វីលីពីន ថាឲ្យតុលាការ ICC មិនយកភ្នែកមើលការ​រំលោភសិទ្ធិមនុស្សរបស់លោកខាងលិច

សមាជិកសភាហ្វីលីពីនម្នាក់កាលពីថ្ងៃសុក្របានថ្កោលទោសតុលាការឧក្រិដ្ឋកម្មអន្តរជាតិ (ICC) ដោយសារតែមិនយកភ្នែកមើលចំពោះការរំលោភសិទ្ធិមនុស្សពីសំណាក់ប្រទេសលោកខាងលិច និងបានហៅតុលាការនេះថា “មើលងាយយុត្តិធម៌អន្តរជាតិ” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រឹទ្ធសមាជិកលោកស្រី Imee Marcos អាយុ ៦៧ ឆ្នាំបាននិយាយថា “ការបរាជ័យជាយូរមកហើយរបស់ ICC ក្នុងការស៊ើបអង្កេតប្រទេសលោកខាងលិចចំពោះឧក្រិដ្ឋកម្មរាប់មិនអស់ប្រឆាំងនឹងមនុស្សជាតិ ធ្វើឲ្យតុលាការមួយនេះក្លាយជារូបភាពអាក្រក់នៃយុត្តិធម៌អន្តរជាតិ” ។

ការអត្ថាធិប្បាយរបស់លោកស្រីបានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីហ្វីលីពីនបានប្រកាសពីចេតនារបស់ខ្លួនក្នុងការផ្តាច់ទំនាក់ទំនងជាមួយ ICC ក្រោយបានច្រានចោលការអំពាវនាវរបស់ទីក្រុងម៉ានីលឲ្យផ្អាកការស៊ើបអង្កេតលើសង្គ្រាមប្រឆាំងគ្រឿងញៀនរបស់ហ្វីលីពីន ។

លោកស្រី Marcos ដែលជាបងស្រីរបស់ប្រធានាធិបតីហ្វីលីពីន Ferdinand Marcos Jr បានអះអាងនៅក្នុងសេចក្តីថ្លែងការណ៍មួយ ដែលបានចេញផ្សាយនៅលើគេហទំព័រ GMA News ថា ICC កំពុងកំណត់គោលដៅលើបណ្តាប្រទេសអាស៊ីអាគ្នេយ៍ និងអាហ្រ្វិក ប៉ុន្តែបានបិទភ្នែក និងមើលមិនឃើញពីកម្រិតនៃការរំលោភសិទ្ធិមនុស្សរបស់ប្រទេសលោកខាងលិចឡើយ” ។

ជាចុងក្រោយ ប្រធានគណៈកម្មាធិការទំនាក់ទំនងបរទេសរបស់ព្រឹទ្ធសភានៃប្រទេសហ្វីលីពីនរូបនេះបានបញ្ជាក់ថា “ខែនេះគឺជាឆ្នាំទី ២០ ហើយនៃការបរាជ័យរបស់ ICC ក្នុងការនាំយកអ្នកសិទ្ធិមនុស្សមកទទួលខុសត្រូវ ហើយទីក្រុងម៉ានីលមិន​អាច​សហការ​ជាមួយ ICC បាននោះទេ ដោយ​សារតែ​ការ​ព្រួយ​បារម្ភ​អំពី​យុត្តាធិការ និងការ​វាយ​ប្រហារ​លើ​អធិបតេយ្យភាព​របស់​ប្រទេសហ្វីលីពីន” ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ សមាជិកសភាមួយចំនួនដើរចេញពីសភា អូទ្រីស មិនខ្ចីស្ដាប់សុន្ទរកថារបស់​លោក Zelensky