ព័ត៌មានជាតិ

ឆក់ទូរស័ព្ទបាន តែជាប់ភ្លើងស្តុបក្រហម ត្រូវប្រជាពលរដ្ឋចាប់បាន

បានផុស

៥ years មុន

នៅ

ថ្ងៃអង្គារ ១៩ មករា ២០២១

ដោយ

ជនសង្ស័យម្នាក់ធ្វើសកម្មភាពឆក់ទូរស័ព្ទពីនារីពីរនាក់ បានសម្រេច ហើយព្យាយាមជិះគេចខ្លួនតែរត់មិនរួចដោយសារជាប់ភ្លើងស្តុបក្រហមទៅមុខលែងរួច ក៏ត្រូវប្រជាពលរដ្ឋដេញចាប់បានភ្លាមៗ។

ហេតុការណ៍នេះ បានកើតឡើងកាលពីវេលាម៉ោង០១ និង៣០នាទីរសៀល ថ្ងៃទី១៨ ខែមករា ឆ្នាំ ២០២១ ស្ថិតនៅតាមបណ្តោយផ្លូវបេតុងចេញផ្សារទួលពង្រទៅផ្លូវចោមចៅ ស្ថិតក្នុងភូមិត្រពាំងថ្លឹង១ សង្កាត់ ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យមានឈ្មោះ សៀក រ៉ូស្សា អាយុ២៨ឆ្នាំ មុខរបរអ្នកដឹកជញ្ជូនឥវ៉ាន់អនឡាញ ស្នាក់នៅ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។

ជនរងគ្រោះ បានរៀបរាប់ឱ្យដឹងថា មុនកើតហេតុ ពួកគេទាំងពីរនាក់ ជិះម៉ូតូម៉ាកស្កុបពី ពណ៌ផ្កាឈូក លាយ ស ពាក់ស្លាកលេខ ភ្នំពេញ1AY-9390 បើកបរតាមបណ្តោយផ្លូវបេតុង(៣០ម៉ែត្រ)ទិសដៅពីត្បូង ទៅជើង ហើយបានដាក់ទូរសព្ទម៉ាកSamsung Galaxy S10Plus មួយគ្រឿងចូលនៅក្នុងឃ្លុបម៉ូតូខាងមុខ លុះមកដល់ចំណុចកើតហេតុ ស្រាប់តែលេចមុខជនសង្ស័យម្នាក់ជិះម៉ូតូឌ្រីមសង់ ពណ៌ខ្មៅ ស៊េរីឆ្នាំ២០២០ មួយគ្រឿង ពាក់ស្លាកលេខភ្នំពេញ1IH-5842 ជិះមកពីក្រោយ ហើយធ្វើសកម្មភាពឆក់យកទូរសព្ទពីឃ្លុបម៉ូតូបានសម្រេច និងព្យាយាមជិះរត់គេចខ្លួន។

ប្រភពបានបន្តថា ពេលឃើញដូចនេះ ក៏ស្រែកឲ្យប្រជាពលរដ្ឋជួយ និងដេញតាមពីក្រោយរហូតមកដល់ស្តុបទួលពង្រ ដោយសារភ្លើងស្តុបលោតពណ៌ក្រហម ស្ទះចរាចរណ៍ផងនោះ ទើបចាប់ជនសង្ស័យបានតែម្តង។

ក្រោយចាប់បាន សមត្ថកិច្ចបាននាំខ្លួនជនសង្ស័យយកមកប៉ុស្តិ៍នគរបាលរដ្ឋបាលចោមចៅទី១ និងឲ្យជនរងគ្រោះមកដាក់ពាក្យបណ្តឹង ដើម្បីចាត់ការតាមនិតិវិធីច្បាប់៕

អត្ថបទ ៖ សុខុម 