ព័ត៌មានជាតិ

រាជរដ្ឋាភិបាល ចំណាយជាង ១ ពាន់លានដុល្លារ ឧបត្ថម្ភជូនគ្រួសារក្រីក្រ និងងាយរងគ្រោះ អំឡុងប្រយុទ្ធជំងឺកូវីដ-១៩

បានផុស

៣ years មុន

នៅ

ថ្ងៃពុធ ២៦ មេសា ២០២៣

ដោយ

រាជរដ្ឋាភិបាល បានចំណាយថវិកាប្រមាណជាង ១ ពាន់លានដុល្លារអាមេរិក ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ ដើម្បីជួយសម្រួលដល់ការដោះស្រាយជីវភាពប្រចាំថ្ងៃឲ្យកាន់តែប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្ដីជូនដំណឹងរបស់ក្រសួងសង្គមកិច្ចអតីតយុទ្ធជន និងយុវនីតិសម្បទា បានឲ្យដឹងថា ចាប់តាំងពីថ្ងៃទី ២៥ ខែមិថុនា ឆ្នាំ ២០២០ រហូតមកដល់ថ្ងៃទី ២៤ ខែមេសា ឆ្នាំ ២០២៣ នេះរដ្ឋាភិបាល បានបើកសាច់ប្រាក់ឧបត្ថម្ភជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ បានចំនួន ៣៤ លើក ដែលមានទឹកប្រាក់ចំនួន ៤០១២១៣០០៦៧០០០ រៀល (បួនពាន់មួយរយពីរប៊ីលានមួយរយសាមសិបលានហុកសិបប្រាំពីរពាន់រៀលគត់) ឬស្មើនឹងប្រមាណ ១០២៥,៥៣ លានដុល្លារអាមេរិក ដោយមានប្រជាពលរដ្ឋចំនួន ៧០៤៩៨០ គ្រួសារ ដែលមានសមាជិកចំនួន ២៧៨៣០២៤ នាក់។

ក្នុងនោះប្រជាពលរដ្ឋក្រីក្រកម្រិត ១ មានចំនួន ២៦៧៣៦៥ គ្រួសារ ក្រីក្រកម្រិត ២ មានចំនួន ៤៣៧៦១៥ គ្រួសារ កុមារអាយុចាប់ពី ០ ដល់ ៥ ឆ្នាំ មានចំនួន ១០៩៩៨០ នាក់ មនុស្សចាស់អាយុ ៦០ ឆ្នាំ មានចំនួន ៣៨៦៥៧០ នាក់ ជនមានពិការភាពចំនួន ៦០៦៣៦ នាក់ និងគ្រួសារមានអ្នកជំងឺអេដស៍ចំនួន ២០៣៦ នាក់។

ជាមួយគ្នានេះដែរ ក្រសួងសង្គមកិច្ច បានជូនដំណឹងពីការបើកសាច់ប្រាក់ឧបត្ថម្ភជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងកូវីដ ជុំទី ១៣ លើកទី ១ ចាប់ពីថ្ងៃទី ២៥ ខែមេសា ដល់ថ្ងៃទី ២៤ ខែឧសភា ឆ្នាំ ២០២៣។

ក្រសួងសង្គមកិច្ច បានណែនាំដល់គ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងកូវីដ-១៩ ពេលទៅបើកប្រាក់ឧបត្ថម្ភនៅតាមបញ្ជរវីង តម្រូវឲ្យអ្នកទទួលផលត្រូវភ្ជាប់ទៅជាមួយនូវឯកសារពាក់ព័ន្ធដូចគ្នានឹងការបើកប្រាក់ឧបត្ថម្ភលើកមុនៗផងដែរ ពិសេសបណ្ណសមធម៌ ដែលនៅមានសុពលភាព និងត្រូវចងចាំលេខកូដសម្ងាត់។ ករណីភ្លេចលេខសម្ងាត់ សូមទំនាក់ទំនងអ្នកទទួលបន្ទុកកម្មវិធីនៅតាមឃុំ សង្កាត់ ឬ មន្ទីរសង្គមកិច្ចអតីតយុទ្ធជន និងយុវនីតិសម្បទា រាជធានី-ខេត្ត។

ក្នុងករណីប្រជាពលរដ្ឋ ឬ សាធារណជន ពិនិត្យឃើញភាពមិនប្រក្រតីណាមួយក្នុងការអនុវត្តកម្មវិធី ឬ ដកសាច់ប្រាក់មិនបាននៅតាមបញ្ជរវីងណាមួយនោះ សូម សាធារណជន និងអ្នកទទួលផលទាំងអស់ ធ្វើការទំនាក់ទំនងជាមួយអ្នកកាន់កម្មវិធីនៅតាមឃុំ សង្កាត់ ឬ នៅមន្ទីរសង្គមកិច្ចអតីតយុទ្ធជន និងយុវនីតិសម្បទា ឬ មន្ទីរផែនការ រាជធានី ខេត្ត នីមួយៗ៕

អត្ថបទ ៖ សំអឿន

Related Topics:គ្រួសារក្រីក្រ ឧបត្ថម្ភ រាជរដ្ឋាភិបាល

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា