លោកជំទាវលីម ដារ៉ែន ផ្តល់ថវិការទៅមេបញ្ជាការមុខព្រួញស្តាំទិសប្រាសាទព្រះវិហារ

ភ្នំពេញ ៖ លោកជំទាវលីម ដារ៉ែន ជួន ណារិន្ទ បានផ្តល់ថវិការឧបត្ថម្ភ១ពាន់ដុល្លារទៅកាន់មេបញ្ជាការមុខព្រួញស្តាំទិសប្រាសាទព្រះវិហារ គឺវីរកងទ័ព ផល ឌី ក្រោយរងរបួសក្នុងសមរភូមិប្រយុទ្ធរវាងកម្ពុជាថៃ ក្នុងពេលកន្លងមក ។

វីរកងទ័ព ផល ឌី ជានាយការិយាល័យហ្វឹកហ្វឺនកងពលធំអន្តរាគមន៍លេខ៣ និងជាមេបញ្ជាការសមរភូមិមុខព្រួញស្លាបស្តាំនៅប្រាសាទព្រះវិហារ ដោយរូបគាត់ត្រូវរងរបួសក្បាលដោយអំបែងគ្រាប់របស់ទាហានថៃ និងបែកក្រដាស់ត្រចៀក មិនទាន់ធូរស្បើយនៅឡើយទេ ដោយបច្ចុប្បន្នត្រូវតាមដាន និងពិនិត្យជាបន្តបន្ទាប់ពីក្រុមគ្រូពេទ្យ។

តាមរយៈសកម្មភាពក្នុងនាមអ្នកសមរភូមិក្រោយ លោកជំទាវ លីម ដារ៉ែន ជួន ណារិន្ទ តែងតែបានបន្តផ្តល់ជំនួយឧបត្ថម្ភជាបន្តបន្ទាប់ មានជាសម្ភារ ថវិការ និងស្បៀងអាហារជាដើម ទៅកាន់សមរភូមិមុខ ជូនដល់វីរកងទ័ព វីរកកងនគរបាលជាតិ ក៏ដូចជាបងប្អូនប្រជាជនភៀសសឹកកម្ពុជា ដើម្បីជាការរួមចំណែកជាមួយប្រទេសជាតិ ក្នុងគ្រាដែលជាតិកំពុងមានបញ្ហាជម្លោះព្រំដែន ដោយការឈ្លានពាន ទឹកដីពីរដ្ឋបរទេសជិតខាង ។

លោកជំទាវ សូមសម្តែងនូវក្តីកោតស្ញប់ស្ញែងបំផុតចំពោះវីរភាពអង់អាចហានក្លារបស់វីរកងទ័ព និងកងនគរបាលទាំងអស់ ដែលបានលះបង់ទាំងកម្លាំងកាយចិត្ត និងមិនបានស្តាយសូម្បីអាយុជីវិត ដើម្បីការពារបូរណភាពទឹកដីមាតុភូមិកម្ពុជា មិនឲ្យបរទេសណាមកឈ្លានពានបាននោះឡើយ។

តាមរយៈវីរភាពដ៏មហាអង់អាចនេះ នឹងឋិតក្នុងការចងចាំដែលមិនអាចលុបចេញពីដួងចិត្តរបស់ប្រជាជននៅទូទាំងនគរកម្ពុជា បាននោះឡើយ៕

អត្ថបទ៖ សុភា