ព័ត៌មានជាតិ

សប្បុរសជន បន្តឧបត្ថម្ភជំនួយដល់រដ្ឋបាលរាជធានីភ្នំពេញ ដើម្បីផ្គត់ផ្គង់ជួយវីរកងទ័ពនៅសមរភូមិមុខ និងពលរដ្ឋភៀសសឹក

បានផុស

៧ ខែ មុន

នៅ

ថ្ងៃពុធ ១០ ធ្នូ ២០២៥

ដោយ

សប្បុរសជនជាច្រើន តាមរយៈគណៈកម្មការផ្សារ រដ្ឋបាលខណ្ឌ បានបន្តឧបត្ថម្ភជាជំនួយសម្ភារៈ ស្បៀងអាហារ និងថវិកា ដល់រដ្ឋបាលរាជធានីភ្នំពេញ ដើម្បីបន្តផ្គត់ផ្គង់ជួយទៅកាន់វីរកងទ័ពនៅសមរភូមិមុខ ដែលកំពុងឈរជើងរឹងមាំការពារបូរណភាពទឹកដី នៃកម្ពុជា ពីការឈ្លានពានរបស់សៀម និងមួយផ្នែកជូនដល់ប្រជាពលរដ្ឋភៀសសឹក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សប្បុរសជន សម្តែងក្តីពេញចិត្តចំពោះការចូលរួមចំណែកក្នុងការផ្តល់ជាជំនួយជួយបន្តទៅកាន់វីរជនកងទ័ពហានក្លារបស់កម្ពុជា ត្បិតពួកគាត់មិនបានចូលរួមកាន់អាវុធដើម្បីប្រយុទ្ធនៅសមរភូមិមុខក៏ពិតមែន តែក្នុងនាមជាអ្នកសមរភូមិក្រោយ គឺមានតែទឹកចិត្តក្នុងការចូលរួមឧបត្ថម្ភ និងផ្តល់ជាកម្លាំងចិត្ត លើកទឹកចិត្តពីចម្ងាយ ដើម្បីបង្ហាញឲ្យឃើញពីការរួបរួមសាមគ្គីគ្នាក្នុងគ្រាដែលប្រទេសជាតិកំពុងទទួលការឈ្លានពានពីរដ្ឋបរទេស។ ពួកគាត់បន្ថែមថា ក្នុងនាមជាប្រជាពលរដ្ឋ ជឿជាក់យ៉ាងមុតមាំលើរាជរដ្ឋាភិបាល ដែលមាន សម្ដេចអគ្គមហាសេនាបតីតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងវីរកងទ័ពរបស់ប្រទេសកម្ពុជា ក្នុងការការពារបូរណភាពទឹកដី។

កាលពីថ្ងៃទី ៩ ខែធ្នូ ឆ្នាំ ២០២៥ រដ្ឋបាលរាជធានីភ្នំពេញ បានចេញសេចក្ដីជូនដំណឹងអំពីការរៀបចំទទួលនូវអំណោយគ្រប់ប្រភេទដូចជា ៖ ថវិកា ស្បៀងអាហារ គ្រឿងឧបភោគបរិភោគ សម្ភារៈប្រើប្រាស់នានា ព្រមទាំងថ្នាំពេទ្យ ដើម្បីយកទៅចែកជូនវីរកងទ័ពជួរមុខ ដែលបាននិងកំពុងខិតខំតស៊ូការពារបន្ទាត់ព្រំដែនកម្ពុជា យ៉ាងអង់អាចក្លាហាន មោះមុត ប្រឆាំងនឹងសត្រូវឈ្លានពាន ប្រកបដោយស្មារតីស្នេហាជាតិមាតុភូមិ និងចែកជូនប្រជាពលរដ្ឋដែលត្រូវបានជម្លៀសខ្លួនទៅកាន់មណ្ឌលសុវត្ថិភាពនានា។

គួរបញ្ជាក់ថា បន្ទាប់ពីកើតមានបញ្ហាជម្លោះព្រំដែនដោយប្រដាប់អាវុធ ដែលភាគីថៃបានបើកការបាញ់ប្រហារឈ្លានពានចូលមកក្នុងដែនអធិបតេយ្យភាពកម្ពុជារួចមក ប្រជាពលរដ្ឋជាសប្បុរសជនច្រើនកុះករ បានបន្តរួបរួមគ្នាជាធ្លុងមួយ ក្នុងការបន្តជួយឧបត្ថម្ភជំនួយជាស្បៀង សម្ភារៈ និងថវិកាតាមលទ្ធភាព បន្តជាការរួមចំណែកជួយទៅកាន់អ្នកសមរភូមិមុខ។ នេះជាការស.បញ្ជាក់ឲ្យឃើញពីការស្នេហាសាមគ្គីភាព ក្នុងនាមជាឈាមជ័រខ្មែរ ស្រលាញ់ខ្មែរ៕

អត្ថបទ ៖ សុភា