ក្រោយចេញពីកម្ពុជា១១ឆ្នាំ លោក សូ ណារ៉ូ នឹងមកដល់មាតុប្រទេសវិញនៅថ្ងៃទី២៣ មិថុនា

លោកបណ្ឌិត សូ ណារ៉ូ បានប្រកាសនៅលើគណនីហ្វេសប៊ុកផ្លូវការរបស់លោកថា លោករួមជាមួយគ្រួសារនឹងធ្វើមាតុភូមិនិវត្តន៍មកដល់អាកាសយាន្តដ្ឋានអន្តរជាតិភ្នំពេញ វេលាម៉ោង ១៖០០ នាទីរសៀល ថ្ងៃទី២៣ ខែមិថុនា ឆ្នាំ២០២៣។

នៅលើគណនីហ្វេសប៊ុករបស់ខ្លួន លោករដ្ឋមន្តី្រប្រតិភូអមនាយករដ្ឋមន្ត្រីដែលមានអតីតភាពជាអ្នកសារព័ត៌មានរូបនេះ បានសរសេរថា ក្នុងនាមលោកជារដ្ឋមន្ត្រីប្រតិភូអមនាយករដ្ឋមន្ត្រី នាវេលាម៉ោង៣៖ ០០នាទីរសៀល ថ្ងៃសៅរ៍ទី ២៤ ខែមិថុនា លោកនឹងធ្វើសន្និសីទសារព័ត៌មានមួយនៅវិមានសន្ដិភាព បន្ទប់លេខ១-២ ជាន់ទី៤។

គួរបញ្ជាក់ថា លោកបណ្ឌិត សូ ណារ៉ូ រួមជាមួយគ្រួសារ បានចាកចេញពីប្រទេសកម្ពុជាជាភូមិឋានកំណើត​ទៅរស់នៅសហរដ្ឋអាមេរិក កាលឆ្នាំ២០១២ រហូតមកដល់ឆ្នាំ២០២៣នេះ គឺមានរយៈពេល ១១ឆ្នាំហើយ។ ជុំវិញការធ្វើមាតុភូមិនិវត្តន៍របស់លោកបណ្ឌិតវ័យ៥៨ឆ្នាំនេះ គឺជាការវិលមកបំពេញការងារក្នុងក្របខណ្ឌរដ្ឋ ជារដ្ឋមន្ត្រីប្រតិភូអមនាយករដ្ឋមន្ត្រី បន្ទាប់ពីព្រះមហាក្សត្រតែងតាំងកាលពីថ្ងៃទី៨ ខែឧសភា ឆ្នាំ២០២៣៕

ដោយ៖ ង៉ិល ណារ៉ាត់