សម្ដេចតេជោ ហ៊ុន សែន ណែនាំបណ្ឌិត សូ ណារ៉ូ អត្ថាធិប្បាយពីស្ថានភាពពិតនៅកម្ពុជា ក្រោយត្រឡប់មកពីអាមេរិកវិញ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានណែនាំឲ្យលោកបណ្ឌិត សូ ណារ៉ូ ដែលទើបត្រឡប់មកពីប្រទេសអាមេរិកវិញ ពិនិត្យមើលស្ថានភាពពិតនៃប្រទេសកម្ពុជា ហើយធ្វើការអត្ថាធិប្បាយឲ្យប្រជាពលរដ្ឋនៅក្រៅប្រទេសបានដឹងផង។

ការណែនាំរបស់សម្ដេចតេជោ ហ៊ុន សែន ធ្វើឡើងក្នុងជួបសំណេះសំណាលជាមួយកម្មករ-និយោជិត នៅក្រុងច្បារមន និងស្រុកសំរោងទង ខេត្តកំពង់​ស្ពឺ នាព្រឹកថ្ងៃទី ២៧ ខែមិថុនា ឆ្នាំ ២០​២៣។

សម្ដេចតេជោ ហ៊ុន សែន បានថ្លែងថា រាជរដ្ឋាភិបាល នឹងបណ្ដុះបណ្ដាលប្រជាពលរដ្ឋក្នុង ១ឆ្នាំចំនួន ៣០ម៉ឺននាក់ ហើយដែលក្នុងរយៈពេល ៥ឆ្នាំខាងមុខនេះ នឹងត្រូវបណ្ដុះបណ្ដាលឲ្យបាន ១លាន ៥សែននាក់។

សម្ដេចតេជោ ហ៊ុន សែន លើកឡើងជាសំណួរថា «តើនេះឬជានយោបាយបំផ្លាញជាតិ ឬក៏ជានយោបាយដោះស្រាយបញ្ហាឲ្យជាតិ អ្នកព្រូសចេះតែព្រូសទៅ គេហៅថា ឆ្កែចេះតែព្រូស មនុស្សចេះតែដើរនិយាយតាមមួយបែបទៅ យើងមិនគួរប្រើពាក្យព្រូសទេ ប៉ុន្តែតិរច្ឆានបើមិនប្រើអញ្ចឹងក៏មិនកើតដែរ ព្រោះយើងថា ឯកឧត្ដមអើយ កុំព្រូសក៏វាមិនកើត ព្រោះជ្រុលហួស»។

សម្ដេចតេជោ ហ៊ុន សែន ក៏បានលើកឡើងអំពីលោកបណ្ឌិត សូ ណារ៉ូ ដែលទើបត្រឡប់មកពីប្រទេសអាមេរិកវិញ ក្រោយពីចាកចេញពីប្រទេសកម្ពុជាអស់រយៈពេល ១១ឆ្នាំកន្លងមក។ «សូ ណារ៉ូ ទើបនឹងមកពីអាមេរិក នៅអាមេរិកលឺគេនិយាយអ្វីខ្លះពីកម្ពុជា ឥឡូវមកដល់កម្ពុជានិយាយពីកម្ពុជាទៅម្ដងទៅ ចេញពីប្រជុំ ឥឡូវជារដ្ឋមន្ត្រីប្រតិភូអមនាយករដ្ឋមន្ត្រី»។

សម្ដេចតេជោ ហ៊ុន សែន បានថ្លែងប្រាប់ឲ្យលោកបណ្ឌិត សូ ណារ៉ូ ឲ្យពិនិត្យមើលស្ថានភាពពិតនៅក្នុងប្រទេសកម្ពុជា ថាតើមានស្ថានភាពយ៉ាងម៉េច៕