លោក សូ ណារ៉ូ ថា ក្រុមបាតុករដែលប្រឆាំងនឹងសម្ដេចធិបតីនៅជប៉ុន ទទួលបរាជ័យចំនួន៣ ចំណុច   

ក្នុងសន្និកាសែត នាយប់ថ្ងៃទី១៩ ខែធ្នូ ឆ្នាំ២០២៣ លោក សូ ណារ៉ូ រដ្ឋមន្ត្រីប្រតិភូអមនាយករដ្ឋមន្ត្រី អះអាងថា ក្រុមបាតុករ ដែលប្រឆាំងចំពោះដំណើរទស្សនកិច្ចការងាររបស់សម្ដេចធិបតី ហ៊ុន ម៉ាណែត និងគណៈប្រតិភូជាន់ខ្ពស់រាជរដ្ឋាភិបាលកម្ពុជា នៅប្រទេសជប៉ុន បានទទួលភាពបរាជ័យចំនួន៣ចំណុចយ៉ាងអាម៉ាស់។

បើតាមលោក សូ ណារ៉ូ តាមរយៈប្រធានបទរបស់ក្រុមប្រឆាំង ដែលប្រកាសមិនទទួលស្គាល់រាជរដ្ឋាភិបាលរបស់សម្ដេចធិបតី និងបានអំពាវនាវឱ្យភាគីជប៉ុនកុំទទួលស្គាល់សម្ដេចធិបតី គឺបានទទួលបរាជ័យហើយ។ លោក សូ ណារ៉ូ បានបញ្ជាក់ថា តាមរយៈការបោះឆ្នោតជាតិជាសកល នាពីខែកក្កដា ឆ្នាំ២០២៣ កន្លងទៅ បានបង្ហាញយ៉ាងច្បាស់ថា ប្រជាពលរដ្ឋខ្មែរសរុបប្រមាណជាង៨០ភាគរយ បានទៅចូលរួមការបោះឆ្នោតនេះ ហើយសន្លឹកឆ្នោតយ៉ាងច្រើនលើសលុបបានបោះឆ្នោតផ្ដល់សេចក្ដីទុកចិត្តឱ្យគណបក្សប្រជាជនកម្ពុជាបន្តដឹកនាំរាជរដ្ឋាភិបាលកម្ពុជា។

ម្យ៉ាងវិញទៀតនោះ ការអំពាវនាវរដ្ឋាភិបាលជប៉ុនកុំឱ្យទទួលស្គាល់រាជរដ្ឋាភិបាលកម្ពុជានោះ គឺបរាជ័យទាំងស្រុង ផ្ទុយទៅវិញ វត្តមានរបស់សម្ដេចធិបតី ហ៊ុន ម៉ាណែត និងគណៈប្រតិភូជាន់ខ្ពស់រាជរដ្ឋាភិបាលកម្ពុជា ត្រូវបានទទួលស្វាគមន៍យ៉ាងកក់ក្ដៅពីសំណាក់ភាគីជប៉ុន ខណៈសម្ដេចធិបតី ក៏មានជំនួបទ្វេភាគីជាមួយនាយករដ្ឋមន្ត្រីជប៉ុន និងចូលគាល់ព្រះចៅអធិរាជជប៉ុនថែមទៀត។

ចំពោះបរាជ័យទី២ ត្រូវបានលោក សូ ណារ៉ូ បញ្ជាក់ថា ក្រុមបាតុករ ដែលប្រមូលផ្ដុំគ្នាប្រឆាំងនឹងរាជរដ្ឋាភិបាលកម្ពុជា នៅក្នុងប្រទេសជប៉ុនពេលនេះមានចំនួនតិចតួចបំផុតប្រមាណខ្ទង់ជាង១០០នាក់ប៉ុណ្ណោះ បើធៀបនឹងចំនួនប្រជាពលរដ្ឋខ្មែរដែលទៅជួបសំណេះសំណាលជាមួយសម្ដេចធិបតី មានប្រមាណជាង២ពាន់នាក់ឯណោះ។

ក្នុងនោះ ប្រជាពលរដ្ឋ និងនិស្សិតកម្ពុជារស់នៅប្រទេសជប៉ុនជាច្រើននាក់បានមកទទួលស្វាគមន៍យ៉ាងកក់ក្តៅ និងស្និទ្ធស្នាលជាទីបំផុតសម្រាប់វត្តមានថ្នាក់ដឹកនាំរាជរដ្ឋាភិបាលកម្ពុជា ជាពិសេសវត្តមានសម្ដេចធិបតី និងលោកជំទាវ។ លោក សូ ណារ៉ូ ចាត់ទុកថា ចលនាប្រឆាំងនៅក្រៅប្រទេសកាន់តែរួមតិចទៅៗ ដោយសារបាត់បង់ជំជឿទុកចិត្តលើបុគ្គលមួយចំនួនដែលតែងធ្វើនយោបាយជ្រុលនិយម។ ដោយឡែក ភាពបរាជ័យទី៣ គឺដោយហេតុថា មេដឹកនាំនៅពីក្រោយខ្នងនៃបាតុកម្មនេះ កំពុងតែជាប់ឈ្មោះជាទណ្ឌិត ដែលមានទោសទណ្ឌជាធរមានក្រោមអំណាចតុលាការផងដែរនោះ៕