លោកបណ្ឌិត គី សេរីវឌ្ឍន៍ បង្ហាញវិធីសាស្រ្តដើម្បីលុបបំបាត់​កម្ចីអនឡាញខុសច្បាប់

ក្រុមហ៊ុនផ្តល់ប្រាក់ចម្ចីតាមអនឡាញ ឬកម្ចីក្រៅផ្លូវការ បាននិងកំពុងរីកសាយភាយ ដែលបង្កការគំរាម​កំហែង​ដល់ពលរដ្ឋមួយចំនួន និងប៉ះពាល់ដល់វិស័យធនាគារ និងហិរញ្ញវត្ថុនៅកម្ពុជា។

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានលើកឡើងថា ការប្រើកម្ចីក្រៅ​ប្រព័ន្ធខុសគោលការណ៍ បង្កភាពអនាធិបតេយ្យ និងមានការគំរាមកំហែងបណ្តាល​ឱ្យប៉ះពាល់ដល់​សណ្តាប់ធ្នាប់​សាធារណៈ ជាពិសេសកេរ្តិ៍ឈ្មោះរបស់កម្ពុជា ដែលបញ្ហាទាំងអស់នេះ កើតឡើងដោយសារតែអ្នកខ្ចីអនឡាញទាំងនោះ អស់ជម្រើសមានតម្រូវការប្រាក់ជាបន្ទាន់ ដើម្បីដោះបន្ទុក។

លោកបណ្ឌិត គី សេរីវឌ្ឍន៍ បានបន្តថា « អ្នកខ្ចីប្រហែលជា​​មិនខុសទេ តែរឿងធ្វើសកម្មភាពផ្តល់កម្ចីបែបនេះ គួរតែមានវិធានការដាក់ទោសទណ្ឌណាមួយដើម្បីទប់ស្កាត់បញ្ហានេះ ឱ្យខានតែបាន ព្រោះរឿងនេះ​ធ្វើឱ្យខូច​មុខមាត់ប្រទេសជាតិ និងអាចលេចលឺល្បីទៅខាងក្រៅ បង្កើតឱ្យមានកេរ្តិ៍ឈ្មោះ​មិនល្អសម្រាប់កម្ពុជា ខណៈដែលរាជដ្ឋាភិបាលកំពុងតែខិតខំកសាង»។

​ទាក់ទិននឹងបញ្ហានេះ នាយកដ្ឋានព័ត៌មានវិទ្យានៃក្រសួងមហាផ្ទៃ ធ្លាប់បាន​ណែនាំ​ឱ្យ​ពលរដ្ឋប្រុងប្រយ័ត្ន​ល្បិចផ្តល់ប្រាក់កម្ចីតាមអនឡាញខុសច្បាប់នេះ។

បើតាមនាយកដ្ឋានព័ត៌មានវិទ្យា ករណីនេះ ជនខិលខូចបានបង្កើតទំព័រហ្វេសប៊ុកផេក ឬគេហទំព័រ ដោយដាក់​ឈ្មោះក្រុមហ៊ុនកម្ចីប្រាក់អនឡាញ។ ពួកគេធ្វើការផ្សព្វផ្សាយទំព័រហ្វេសប៊ុកផេក ឬគេហទំព័រ (Ads) លើបណ្តាញ​ទំនាក់ទំនងសង្គម ដើម្បីធ្វើការអូសទាញការចាប់អារម្មណ៍ពីជនរងគ្រោះ។ ជនរងគ្រោះអាចធ្វើការស្នើសុំកម្ចីពីជនខិលខូច ជាមួយលក្ខខណ្ឌងាយៗ ដោយគ្រាន់តែផ្តល់នូវរូបថតអត្តសញ្ញាណប័ណ្ណ លេខទូរស័ព្ទ រូបភាព ឬវីដេអូអាក្រាត​កាយ​របស់ជនរងគ្រោះ។ បន្ទាប់មក ជនខិលខូចនឹងប្រើប្រាស់ព័ត៌មានអត្តសញ្ញាណប័ណ្ណ រូបភាព ឬវីដេអូអាក្រាតកាយ ដើម្បីគំរាមកំហែងជនរងគ្រោះករណីពុំសងប្រាក់ ឬបង់ការប្រាក់ដ៏ច្រើនលើសលប់។ ក្នុងករណីមួយចំនួនទៀត ពួកគេ​បាន​ធ្វើការប្រើប្រាស់រូបភាព ឬវីដេអូអាក្រាតកាយជនរងគ្រោះគំរាមទារប្រាក់ ឬជួញដូរផងដែរ។ សមត្ថកិច្ចបាន​ធ្វើការ​បង្រ្កាបជាបន្តបន្ទាប់ តែករណីនេះនៅតែមានកើតមានឡើង។

ដើម្បីទប់ស្កាត់ការរីកសាយភាយអំពើខុសច្បាប់ទាំងនេះ លោកបណ្ឌិត គី សេរីវឌ្ឍន៍ បានលើកឡើងថា សមត្ថកិច្ច​ឬស្ថាបនពាក់ព័ន្ធ គួរតែប្រកាសជាសាធារណៈអំពីសេចក្តីណែនាំណាមួយថា ប្រសិនបើខ្ចីប្រាក់ក្រៅប្រព័ន្ធ អ្នកខ្ចី​មិនចាំបាច់សង ហើយការគំរាមកំហែងគឺជាទោសព្រហ្មទណ្ឌ  នោះនឹងអាចគ្រប់គ្រងបាន​ហើយមុខរបរ​ទាំអស់នោះនឹងត្រូវបានបញ្ចប់។  

ពាក់ព័ន្ធនឹងបញ្ហានេះដែរ សមាគមមីក្រូហិរញ្ញវត្ថុកម្ពុជា បានជំរុញឱ្យពលរដ្ឋដែលមានតម្រូវការប្រាក់ គួរប្រើប្រាស់​កម្ចី​ពីគ្រឹះស្ថានហិរញ្ញវត្ថុដែលស្របច្បាប់ ជៀសវាងការចងការប្រាក់ក្រៅផ្លូវការ ឬកម្ចីតាមអនឡាញ ដើម្បីកុំឱ្យមានបញ្ហា ឬការគំរាមកំហែងផ្សេងៗ។

លោក កាំង តុងងី អ្នកនាំពាក្យសមាគមមីក្រូហិរញ្ញវត្ថុកម្ពុជា បានឱ្យដឹងថា មានពលរដ្ឋមួយចំនួនបាន​ធ្លាក់ខ្លួនជាប់បំណុលវ័ណ្ឌក ដោយសារតែកម្ចីទាំងនោះមានអត្រាការប្រាក់ខ្ពស់។

ធនាគារជាតិនៃកម្ពុជាកាលពីពេលថ្មីៗនេះ បានព្រមានចាត់វិធានការតាមផ្លូវច្បាប់ ចំពោះក្រុមហ៊ុន ឬបុគ្គលដែលមិនមានអាជ្ញាប័ណ្ណ តែធ្វើសកម្មភាពយ៉ាងសកម្ម ក្នុងការផ្ដល់ឥណទានជូនប្រជាពលរដ្ឋ និងស្នើដល់ប្រជាពលរដ្ឋទាំងអស់ ប្រើប្រាស់សេវាហិរញ្ញវត្ថុផ្លូវការ ដែលស្ថិតក្រោមការត្រួតពិនិត្យរបស់​ធនាគារជាតិនៃកម្ពុជា ព្រោះអតិថិជនរបស់គ្រឹះស្ថានទាំងនោះ ត្រូវបានការពារដោយច្បាប់៕