លោក បៃដិន៖ ចិន​ ចង់ជំនួសអាមេរិក ជាមហាអំណាចពិភពលោក

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃអាទិត្យ ទី៩ ខែកក្កដា ប្រធានាធិបតីអាមេរិកលោក ចូ បៃដិន បានបញ្ចេញមតិថា មេដឹកនាំចិន លោក ស៊ី ជីនពីង ចង់ឲ្យចិន ជំនួសសហរដ្ឋអាមេរិក ក្នុងនាមជាមហាអំណាចពិភពលោក។

លោក បៃដិន អះអាងថា “លោក ស៊ី ចង់ឲ្យចិន ក្លាយជាប្រទេសមានសេដ្ឋកិច្ចធំ និងសមត្ថភាពយោធាធំបំផុតក្នុងពិភពលោក។ លោក ស៊ី ក៏ចង់សរសេរច្បាប់នៃសណ្តាប់ធ្នាប់អន្តរជាតិមួយចំនួន ឡើងវិញផងដែរ​ ប៉ុន្តែមិនមែនទាំងអស់ឡើយ”។

ប៉ុន្តែទោះជាយ៉ាងណា លោក បៃដិន មានជំនឿថា សហរដ្ឋអាមេរិកនិងចិន ក៏នឹងអាចបង្កើតទំនាក់ទំនងការងារ ដែលនឹងផ្តល់ផលប្រយោជន៍ដល់ភាគីទាំងពីរ ។

លោក បៃដិន និយាយថា “ខ្ញុំគិតថា មានវិធីដើម្បីដោះស្រាយ​និងបង្កើតទំនាក់ទំនងការងារជាមួយប្រទេសចិន ដែលផ្តល់ផលប្រយោជន៍ដល់ពួកគេ និងយើង”។

ប្រធានាធិបតីសហរដ្ឋអាមេរិក បានធ្វើសេចក្តីថ្លែងការណ៍បែបនេះ ខណៈលោករៀបនឹងចាកចេញទៅចក្រភពអង់គ្លេស ដើម្បីជួបជាមួយស្តេច Charles ទី៣ មុនពេលបន្តទៅប្រទេសលីទុយអានី សម្រាប់កិច្ចប្រជុំកំពូលរបស់អង្គការណាតូនៅថ្ងៃទី ១១ ដល់ថ្ងៃទី១២ ខែកក្កដា ហើយបន្ទាប់មក ឈប់សំចតចុងក្រោយនៅប្រទេសហ្វាំងឡង់។

ទន្ទឹមនោះ ការ​អត្ថាធិប្បាយ​របស់​លោក បៃដិន ពាក់ព័ន្ធ​ប្រទេស​ចិន ក៏​បាន​កើត​ឡើងផងដែរ ​ចំពេល​មាន​ភាពខ្វែងគំនិត​គ្នា​ផ្នែក​សេដ្ឋកិច្ច និង​ហិរញ្ញវត្ថុ​រវាង​ប្រទេស​ទាំង​ពីរ។

គួរបញ្ជាក់ថា ទំនាក់ទំនងរវាងអាមេរិកនិងចិន មានភាពតានតឹងដោយសារ ការរឹតត្បិតរបស់សហរដ្ឋអាមេរិក លើការនាំចេញទំនិញនិងសេវាកម្ម, ការបន្តយកពន្ធលើទំនិញចិន, ការគំរាមកំហែងរបស់ទីក្រុងវ៉ាស៊ីនតោនប្រឆាំងនឹងទីក្រុងប៉េកាំង ជុំវិញកិច្ចសហប្រតិបត្តិការក្រោយៗទៀតជាមួយទីក្រុងមូស្គូ, កំណើនពាណិជ្ជកម្មពិភពលោកជាប្រាក់យ័ន និងការថយចុះឥទ្ធិពលនៃប្រាក់ដុល្លារអាមេរិកនៅទូទាំងពិភពលោក៕

ប្រែសម្រួល៖ Vann Vann

ប្រភព៖ Sputnik

ចុចអាន៖ លោក បៃដិន មិនគិតថា ការហៅលោក ស៊ី ជា “ជនផ្ដាច់ការ” ប៉ះពាល់ ដល់ទំនាក់ទំនង អាមេរិក-ចិន ឡើយ