សម្តេចតេជោ និងមន្ត្រីរដ្ឋាភិ​បា​ល​ជាច្រើនរូបបន្តកាត់ប្រាក់ខែ ដើម្បី​​ទប់ស្កាត់ជំងឺកូវីដ១៩

ឥទ្ធិពលនៃជំងឺកូវីដ១៩ នៅតែបន្តកើតមានឡើង នៅក្នុងប្រទេសកម្ពុជា បើទោះបីជាបានឆ្លងកាត់​រយៈពេលពេញ ១ ឆ្នាំនេះទៅហើយក្តី។

គិតត្រឹមថ្ងៃទី ២៦ ខែមករា នេះ អ្នកជំងឺកូវីដ១៩ សរុប​ចំ​នួន ៤៥៨ នាក់ឆ្លងជំងឺកូវីដ១៩ និងជា​សះ​ស្បើយ ៤០៩ នាក់ ខណៈ ៤៩ នាក់កំពុង​សម្រា​ក​ព្យា​បាល​នៅមន្ទីរពេទ្យ។

គ្រាដែលកម្ពុជានៅតែបន្តមានករណីឆ្លងជំងឺកូវីដ១៩ ប្រមុខដឹកនាំរាជរដ្ឋាភិបាលកម្ពុជា និងមន្ត្រី​ជា​ច្រើនរូប បានប្រ​កាស​បន្ត​កាត់ប្រាក់បៀវត្សប្រចាំខែ ដើម្បីចូលរួមទប់ស្កាត់​ជំងឺកូវីដ១៩។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា មានប្រសាសន៍ថា ដើម្បីចូលរួមទប់​ស្កាត់ជំងឺ​កូវីដ​១៩ រយៈពេល ៧ ខែកន្លងមកសម្តេចបានកាត់ប្រាក់​ខែរបស់សម្តេចទាំងអស់ជូនទៅក្រសួង​សុខា​ភិបាល ដែលមានទឹកប្រាក់សរុប ចំនួនជាង ៦៣ លានរៀល(៦៣.៦៣៩.០០០)។

បន្ថែមពីនេះ សម្តេចនាយករដ្ឋមន្ត្រី បានបន្ត​​​​​​​​​កាត់បៀវត្សទាំងអស់ក្រោយការបង់ពន្ធរយះពេល៧​​​​​​​​​​​​​​​​ខែទៀតជូន​ទៅក្រសួងសុខាភិបាលដោយចាប់ពីខែកុម្ភះឆ្នាំ២០២១ ដល់ ខែសីហា ឆ្នាំ២០២១។

បន្ទាប់ពីការប្រកាស របស់សម្តេចតេជោ ហ៊ុន សែន មានមន្ត្រីរដ្ឋាភិបាលថ្នាក់ដឹកនាំជាច្រើរូប ទៀត ក៏បានប្រកាសបន្តកាត់ប្រាក់ខែរបស់ខ្លួន ដើម្បីទប់ស្កាត់ជំងឺកូវីដ១៩ ផងដែរ។

លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានប្រកាស កាត់ ប្រាក់​បៀវត្សរយៈពេល៦ខែ ជូនទៅក្រសួងសុខាភិបាល ដើម្បីប្រយុទ្ធនឹងជំងឺកូវីដ១៩។

លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានប្រកាសប្រកាសកាត់បៀវត្សរយៈពេល៦ខែ ជូនទៅក្រសួងសុខាភិបាល ដើម្បីប្រយុទ្ធនឹងជំងឺកូវីដ១៩។

លោក កើត រិទ្ធ រដ្ឋមន្ត្រីក្រសួងយុត្តិធម៌ នៅថ្ងៃទី២៦ ខែមករា ឆ្នាំ២០២១នេះ បានប្រកាសប្រកាសកាត់បៀវត្សរយៈពេល៦ខែ ជូនទៅក្រសួងសុខាភិបាល ដើម្បីប្រយុទ្ធនឹងជំងឺកូវីដ១៩។

ក្រៅពីនេះ មានរដ្ឋមន្ត្រីជាច្រើនរូបទៀត បានប្រកាសកាត់ប្រាក់បៀវត្សជាបន្តបន្ទាប់ ដូចជារដ្ឋមន្ត្រីក្រសួងសារណការ លោក ស៊ុន ចាន់ថុល រយៈពេល ៦ ខែ និងរដ្ឋមន្ត្រី​ជាច្រើនរូបទៀត៕

អត្ថបទ៖ ឡេង ដេត