ព័ត៌មានជាតិ

កម្ពុជា នាំចេញទៅវៀតណាមកើនដល់ជាង ១.៤ពាន់លានដុល្លារ ក្នុងឆមាសទី១

បានផុស

១១ ខែ មុន

នៅ

ថ្ងៃពុធ ១៩ កក្កដា ២០២៣

ដោយ

កម្ពុជា បាននាំចេញទៅវៀតណាម មានទំហំទឹកប្រាក់ប្រមាណជាង ១.៤ពាន់លានដុល្លារ ក្នុងរយៈពេល ៦ខែ ចាប់ពីខែ មករា - មិថុនា ឆ្នាំ ២០២៣ មានការកើនឡើង ២១.៧ភាគរយ ខណៈការនាំចូលពីវៀតណាមមានចំនួនទឹកប្រាក់ ១.៨ ពាន់លានដុល្លារ កើនឡើង ១.៣ភាគរយ បើធៀបនឹងរយៈពេលដូចគ្នាកាលពីឆ្នាំ ២០២២។ កំណើននៃការនាំចេញនេះ នាំឱ្យវៀតណាម ជាប់ចំណាត់ថ្នាក់លេខ២ បន្ទាប់ពីអាមេរិក ដែលទទួលទិញទំនិញរបស់កម្ពុជា ច្រើនជាងគេ នៅក្នុងរយៈពេល ៦ខែនេះ។ នេះបើយោងតាមរបាយការណ៍គយ និងរដ្ឋាករកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពដដែលបានបង្ហាញថា សម្រាប់ការនាំចេញក្នុងខែ មិថុនា ឆ្នាំ ២០២៣ របស់កម្ពុជា ទៅវៀតណាម សម្រេចបានប្រមាណជាង ១០៥លានដុល្លារ កើនឡើង ១០.២ភាគរយ បើធៀបនឹងឆ្នាំ ២០២២ មានចំនួនជាង ៩៥លានដុល្លារ។

សម្រាប់ទំនិញចម្បងគេដែលកម្ពុជា នាំទៅវៀតណាម គឺផលិតផលកសិកម្ម រួមមាន (ស្រូវ, កៅស៊ូ, ស្វាយចន្ទី, ដំឡូងមី ជាដើម), ចំណែកផលិតផលវៀតណាមនាំមកកម្ពុជា មានដូចជា ដែក សម្ភារសំណង់ ប្រេង បន្លែ ផ្លែឈើ ជី និងគ្រឿងយន្ត ជាដើម។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា មើលឃើញថា ទៅថ្ងៃអនាគត កំណើនសេដ្ឋកិច្ច និងការវិនិយោគរបស់កម្ពុជា នឹងអាចបង្កើនការនាំចេញទំនិញកាន់តែច្រើនទៅទីផ្សារអន្តរជាតិ ជាពិសេសនាំចូលមកវិញនូវកំណើនភ្ញៀវទេសចរផងដែរ។

លោកឧកញ៉ា បានបន្តថា «ទៅថ្ងៃអនាគត ការនាំចូលកាន់តែមានការថយចុះ ព្រោះយើងបានបង្កើនការផលិត ដោយមានការវិនិយោគទាំងក្នុងស្រុក និងមកពីបរទេស ដើម្បីបង្កើនការនាំចេញតាមរយៈកិច្ចព្រមព្រៀងពាណិជ្ជកម្មផ្សេងៗ ក៏ដូចជាភាពអនុគ្រោះពន្ធ EBA GSP ដែលនឹងធ្វើឱ្យការនាំចេញរបស់យើងកើនឡើង»។

សូបញ្ជាក់ថា ក្នុងឆ្នាំ ២០២២ ពាណិជ្ជកម្មទ្វេភាគីកម្ពុជា-វៀតណាម សម្រេចបានទឹកប្រាក់សរុបជាង ៦.១ ពាន់លានដុល្លារ កើនឡើង ១៩,៦ ភាគរយបើធៀបឆ្នាំ ២០២១។ ក្នុងនោះកម្ពុជានាំទំនិញទៅវៀតណាម មានទឹកប្រាក់ជាង ២.១ពាន់លានដុល្លារ កើន ៩,២ ភាគរយ និងទំនិញវៀតណាមនាំមកកម្ពុជាមានចំនួនជាង ៣.៩ពាន់លានដុល្លារ កើនឡើង ២៦,២ ភាគរយ៕

Related Topics:

Up Next

សហជីពឯករាជ្យមួយ អំពាវនាវដល់កម្មករអញ្ជើញទៅបោះឆ្នោតនៅថ្ងៃទី ២៣ កក្កដា ឲ្យបានគ្រប់ៗគ្នា

Don't Miss

ទឹកធ្លាក់ថ្មក្រាលទាក់ទាញទេសចរទៅលេងរាប់រយនាក់ក្នុងមួយសប្ដាហ៍