អ្នកនិពន្ធ​ជាច្រើននាក់លើពិភពលោក ជំរុញឲ្យក្រុមហ៊ុន AI គោរពកម្មសិទ្ធិបញ្ញា​

អ្នកនិពន្ធរាប់ពាន់នាក់នៅលើពិភពលោកបានដាក់លិខិតជំរុញឲ្យក្រុមហ៊ុន AI ស្វែងរកការអនុញ្ញាតពីម្ចាស់ស្នាដៃនិពន្ធជាមុនសិន មុននឹងបញ្ចូលស្នាដៃដែលត្រូវបានរក្សាសិទ្ធិទៅក្នុងបច្ចេកវិទ្យារបស់ពួកគេ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សំបុត្រដែលផ្ញើទៅកាន់ក្រុមហ៊ុនបច្ចេកវិទ្យាដូចជា OpenAI, Meta, Microsoft និងក្រុមហ៊ុន AI ផ្សេងទៀតត្រូវបានចុះហត្ថលេខាដោយអ្នកនិពន្ធប្រលោមលោកជាច្រើនរូប រួមទាំងអ្នកដែលឈ្នះរង្វាន់ Pulitzer សញ្ជាតិអាមេរិកលោកស្រី Jennifer Egan, លោក Michael Chabon, លោកស្រី Louise Erdrich ក៏ដូចជាអ្នកនិពន្ធអាមេរិកល្បីឈ្មោះ James Patterson, Suzanne Collins, អ្នកនិពន្ធកាណាដា Margaret Atwood, Jonathan Franzen, Celeste Ng, Nora Roberts និង Ron Chernow ជាដើម ។  

ក្នុងសំណេរនោះ អ្នកនិពន្ធបានស្នើសុំឲ្យអ្នកដឹកនាំ AI ទទួលបានការអនុញ្ញាតសម្រាប់ការរក្សាសិទ្ធិនៅក្នុងកម្មវិធី AI ជំនាន់ថ្មី និងផ្តល់សំណងដល់អ្នកនិពន្ធដោយយុត្តិធម៌ ប្រសិនបើមានការប្រើប្រាស់ស្នាដៃរបស់ពួកគេនៅក្នុងកម្មវិធី AI ដោយមិនមានការអនុញ្ញាត ។

ពាក់ព័ន្ធនឹងបញ្ហានេះដែរ លោក Nora Roberts ជាអ្នកនិពន្ធម្នាក់បាននិយាយថា អ្នកនិពន្ធគួរតែត្រូវបានផ្តល់សំណងដោយយុត្តិធម៌ ពីព្រោះពួកគេមិនមែនជាមនុស្សយន្តដែលត្រូវដាក់កម្មវិធីទាំងនោះទេ ហើយ AI មិនអាចបង្កើតរឿងរបស់មនុស្សដោយមិនយកចេញពីរឿងដែលបានសរសេររួចហើយនោះទេ ៕

ប្រែសម្រួល៖ នាង រតនៈ

ប្រភព៖ Anadolu