ព័ត៌មានជាតិ

រដ្ឋបាលខណ្ឌច្បារអំពៅប្រើវិធានការណ៍ក្ដៅចុះចាប់ម៉ូតូដែលចត លើដងផ្លូវ

បានផុស

៥ years មុន

នៅ

ថ្ងៃចន្ទ ១ កុម្ភៈ ២០២១

ដោយ

ក្រោយពីការជូនដំណឹងជារៀងរាល់ថ្ងៃ សុំឲ្យនាំគ្នារក្សាចិញ្ចើមផ្លូវកុំរំលោភបំពានបង្កឲ្យកកស្ទះចរាចរណ៍រាល់ព្រឹកពេក រដ្ឋបាលខណ្ឌច្បារអំពៅសម្រេចប្រើវិធានការណ៍ក្ដៅ ចាប់លើកម៉ូតូជាច្រើនគ្រឿងដាក់លើរថយន្តដែលចតលើចិញ្ចើមផ្លូវបង្កការកកស្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកយ៉ិន វុធ ចៅសង្កាត់ច្បារអំពៅទី២បានប្រាប់កម្ពុជាថ្មីថា នៅព្រឹកថ្ងៃទី១ ខែកុម្ភះនេះសាលាខណ្ឌច្បារអំពៅបានសហការណ៍ជាមួយសាលាសង្កាត់ច្បារអំពៅទី២បានចុះរៀបចំសណ្តាប់ធ្នាប់លើកំណាត់ផ្លូវលេខ៣៦៩ចាប់ពីគល់ស្ពានព្រះមុនីវង្សចាស់រហូតដល់ច្រាំងបាក់ ស្ថិតក្នុងភូមិសាស្ត្រសង្កាត់ច្បារអំពៅទី២ ដោយក្នុងនោះកម្លាំងអាជ្ញាធរបានចាប់លើកយកម៉ូតូជាច្រើនគ្រឿងដែលចតលើទ្រូងផ្លូវបង្កការកកស្ទះចរាចរណ៍យកទៅសាលាខណ្ឌច្បារអំពៅដើម្បីធ្វើការផាកពិន័យនឹងឲ្យម្ចាស់ធ្វើកិច្ចសន្យាបញ្ឈប់ការចតម៉ូតូលើទ្រូងផ្លូវជាបន្តទៀត។

លោកយ៉ិន វុធ បានបញ្ជាក់ថា នេះគឺជាការព្រមានព្រោះគ្មានជម្រើសដោយសារតែការរឹងរូសពីម្ចាស់ម៉ូតូរួមទាំងអ្នកលក់ដូរលើទ្រូងផ្លូវ។

ទាក់ទិននឹងការចុះរៀបចំសណ្តាប់ខាងលើនេះ អ្នកធ្វើដំណើរឆ្លងកាត់ផ្លូវលេខ៣៦៩ចេញពីច្រាំងបាក់ឆ្ពោះមកស្ពានព្រះមុនីវង្ស គឺពួកគាត់នាំគ្នារអ៊ូរទាំដោយសារមានប្រជាពលរដ្ឋមួយចំនួនយកបន្លែផ្លែឈើមកលក់លើផ្លូវក្បែរច្រកចូលផ្សារបន្លែបង្កឲ្យកកស្ទះចរាចរណ៍ពិសេសអ្នកដែលចូលទិញគឺនាំគ្នាចតម៉ូតូលើផ្លូវ។ហើយបើអាជ្ញាធរចុះរៀបចំសណ្តាប់លើផ្លូវនេះឲ្យបានរាល់ថ្ងៃទើបធ្វើដំណើឆ្លងកាត់បាន។ អ្នកធ្វើដំណើរសុំឲ្យអាជ្ញាធរបញ្ឈប់អ្នកលក់ដូរលើផ្លូវ៣៦៩ជាបន្ទាន់។ បើពុំដូច្នេះទេគ្មានផ្លូវធ្វើដំណើរទេ។ តូបក្នុងផ្សារមានម៉ា គគោកបែរជាមកលក់លើផ្លូវទៅវិញ៕

អត្ថបទ ៖ នរា