ព័ត៌មានជាតិ

ឱកាសការងារថ្មីបន្ថែម ជាង ២០០ កន្លែង នឹងត្រូវនាំមកជូនយុវជន ក្នុង”កិច្ចសម្ភាសការងារ” របស់ NEA ស្អែកនេះ

បានផុស

២ years មុន

នៅ

ថ្ងៃពុធ ៦ កញ្ញា ២០២៣

ដោយ

នៅថ្ងៃព្រហស្បតិ៍ ទី ០៧ ខែកញ្ញា ស្អែកនេះ ក្រុមហ៊ុនធំៗ ៤ នឹងផ្ដល់ឱកាសការងារចំនួន ២០៧ កន្លែង សម្រាប់ សិស្ស/និស្សិត និងអ្នកកំពុងស្វែងរកការងារធ្វើនៅក្នុងកម្មវិធី “កិច្ចសម្ភាសការងារ” ដែលសហការរៀបចំដោយទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ និងសហភាពសហព័ន្ធយុវជនកម្ពុជាវិស័យការងារ និងបណ្ដុះបណ្ដាលវិជ្ជាជីវៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះ សិស្ស/និស្សិត និងអ្នកកំពុងតែស្វែងរកការងារធ្វើ ឬ ចង់ផ្លាស់ប្ដូរការងារ អាចយកប្រវត្តិរូបសង្ខេប (CV) ដើម្បីចូលរួមដាក់ពាក្យ និងសម្ភាសផ្ទាល់ភ្លាមៗ ជាមួយ តំណាងក្រុមហ៊ុនទាំង ៤ បាន ចាប់ពីវេលាម៉ោង ៨ និង ០០ នាទីព្រឹក ដល់ម៉ោង ០៥ និង ០០ នាទីល្ងាច នៅក្នុងបរិវេណក្រសួងការងារ និងបណ្ដុះបណ្ដាលវិជ្ជាជីវៈ។

កញ្ញា សូរសៀង សុម៉ាលី ប្រធានផ្នែកជ្រើសរើសបុគ្គលិក នៃក្រុមហ៊ុន FWD Insurance លើកឡើងថា នេះជាលើកទី ១ ដែលក្រុមហ៊ុនចូលរួមជាមួយនឹង NEA ទាំងវេទិកាការងារ និងពិព័រណ៍ការងារថ្នាក់ជាតិ ដែលនឹងរៀបចំនាពេលខាងមុខនេះ។

តំណាងក្រុមហ៊ុន FWD រូបនេះ បន្តថា កញ្ញា ពិតជាសប្បាយរីករាយក្នុងការសហការជាមួយនឹង NEA ដោយសារតែ NEA មានបណ្ដាញច្រើនក្នុងការផ្សព្វផ្សាយព័ត៌មានស្ដីពីការជ្រើសរើសបុគ្គលិក។ កញ្ញា ជឿជាក់ថា ក្រុមហ៊ុន នឹងជ្រើសរើសបុគ្គលិកទាន់តម្រូវការរបស់ក្រុមហ៊ុនដែលកំពុងតែមានការរីកចម្រើន។

កញ្ញា សូរសៀង សុម៉ាលី ក្រើនរំលឹកដល់អ្នកស្វែងរកការងារធ្វើទាំងអស់ថា ប្រសិនបើ សិស្ស/និស្សិត ឬ អ្នកមានបំណងចង់ផ្លាស់ប្ដូរការងារ ចង់បានឱកាសការងារជាមួយក្រុមហ៊ុន FWD អាចអញ្ជើញមកចូលរួមក្នុងកិច្ចសម្ភាសការងារនៅថ្ងៃស្អែកនេះបាន និងសូមកុំភ្លេចនាំយកនូវប្រវត្តិរូបមកជាមួយផង។

សូមជម្រាបថា ក្រុមហ៊ុនធំៗ ទាំង ៤ នោះ រួមមាន ៖ គ្រឹះស្ថានមីក្រូហិរញ្ញវត្ថុ មហានគរ ម.ក ,ក្រុមហ៊ុន Urban Hub (Cambodia) CO.,LTD, ,ក្រុមហ៊ុន អរប៊ីតគ្លូរី អ៊ិនវេសមេន ខមផេនី ,ក្រុមហ៊ុន FWD LIFE INSURANCE (CAMBODIA) PLC.។

ព័ត៌មានបន្ថែម សូមទាក់ទងមជ្ឈមណ្ឌលការងាររាជធានីភ្នំពេញ នៃទីភ្នាក់ងារជាតិមុខរបរ និងការងារ តាមរយៈលេខទូរស័ព្ទ ០១៦ ៧៨៦ ៦៥៥ ឬ គេហទំព័រ www.nea.gov.kh និងទំព័រ facebook neakhmer (អិនអ៊ីអេ ខ្មែរ)៕