សប្ដាហ៍ផ្លាស់ប្ដូរវប្បធម៌ និងភាពយន្តកម្ពុជា ចិន ឆ្នាំ២០២៣ រៀបចំប្រារព្ធនៅ​ចិន

សប្ដាហ៍ផ្លាស់ប្ដូរវប្បធម៌ និងភាពយន្តកម្ពុជា ចិន ឆ្នាំ២០២៣ រៀបចំធ្វើឡើងនៅ សាធារណរដ្ឋប្រជាមានិតចិន។ នេះបើតាមការផ្ដល់ព័ត៌មាន ពីក្រសួងវប្បធម៌ និងវិចិត្រសិល្បៈ នៅព្រឹកថ្ងៃទី២៥ ខែកញ្ញា ឆ្នាំ២០២៣នេះ។

សប្ដាហ៍ផ្លាស់ប្ដូរវប្បធម៌ និងភាពយន្តកម្ពុជា ចិន ឆ្នាំ២០២៣ រៀបចំធ្វើឡើងនៅទីក្រុងហ្វូចូវ ខេត្តហ្វូចៀន សាធារណរដ្ឋប្រជាមានិតចិន ក្រោមអធិបតីភាព លោក ឯក ប៊ុនថា អនុរដ្ឋលេខាធិការ តំណាង បណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្ប: និងថ្នាក់ដឹកនាំគណៈកម្មាធិការបក្សទីក្រុង ហ្វូចូវ។

ព្រឹត្តិការណ៍ ប្រារព្ធនៅរសៀលទី២៤ ខែកញ្ញា ឆ្នាំ២០២៣ ដោយក្នុងឱកាសនោះ មានការចូលរួម មានវត្តមាន ផលិតករភាពយន្ត កម្ពុជា ចិន ព្រមទាំងសិល្បករសិល្បការិនី ភ្ញៀវកិត្តយសជាតិ អន្តរជាតិជាច្រើនរូប។

ការរៀបចំព្រឹត្តិការណ៍សប្តាហ៍ភាពយន្ត និងវប្បធម៌កម្ពុជា-ចិន នាពេលនេះ ក្រោយពីការរៀបចំ សប្ដាហ៍ភាពយន្តចិននៅកម្ពុជា កាលពីខែសីហា ឆ្នាំ ២០២៣ កន្លងទៅ។ ការរៀបចំនេះ គឺជាការរួមចំណែក ដ៏សំខាន់មួយ ក្នុងការលើកកម្ពស់កិច្ចសន្ទនាវប្បធម៌ និងទំនាក់ទំនងរវាងប្រជាជន និងប្រជាជន នៅ ស្របពេលដែលប្រទេសយើងទាំងពីរប្រារព្ធខួបលើកទី៦៥ នៃទំនាក់ទំនងការទូត ឆ្នាំ២០២៣នេះ។

ក្នុងឱកាសនោះ ក៏មានការចាក់បញ្ចាំងភាពយន្តរឿង ដើម្បីកូន និពន្ធ និងដឹកនាំរឿងដោយ លោក ហ៊ុយ យ៉ាឡេង។