Oliva Kong ច្នៃម៉ូដតាមអប្សរាអង្គរ គ្រងឈុត Fashion ទទួលបានការកោតសរសើរ​លើឆាកអន្តរជាតិ

លោក ម៉ែន សីហា ហៅ Oliva Kong គឺជាអ្នកច្នៃម៉ូដល្បីមួយរូបនៅកម្ពុជា។ អ្នកច្នៃម៉ូដរូបនេះ បានចេញទៅ​សម្តែងនៅកម្មវិធី Milan Fashion Week នៅប្រទេសអ៊ីតាលី ស្វីស និងបារាំង កាលពីថ្ងៃទី ២៤ កញ្ញា។

ក្នុងចំណោម ១៦ប្រទេស Oliva Kong តំណាងឱ្យកម្ពុជា ទទួលបានកិត្តិយស TOP FASHION DESIGNER AWARD 2023 ក្នុងកម្មវិ ធីMilan Fashion Week ដោយទទួលបានការកោតសរសើរ ក្រោយលោកដក​ស្រង់ម៉ូដសក់អប្សរាអង្គរវត្ត គ្រងជាមួយឈុតសម្លៀកកបំពាក់បែបហ្វេសសិន ចូលរួមសម្តែងនៅក្នុងកម្មវិធីនេះ។

លោកបានលើកឡើងដូច្នេះថា« ខ្ញុំបាទ ពិតជារំភើបសម្រាប់ជោគជ័យមួយនេះ ក្នុងនាមខ្ញុំបាទជា Designer កូនខ្មែរមួយរូបដែលបានឃើញកម្ពុជា មានវត្តមាននៅលើឆាកអន្តរជាតិ ហើយទទួលបាននូវការគោរព កោតសរសើរ​យ៉ាងខ្លាំង ជាពិសេស ខ្ញុំបាទបានដកស្រង់ម៉ូតសក់អប្សរាអង្គរវត្ត គ្រងជាមួយឈុតសម្លៀកបំពាក់​បែបហ្វេសសិន​ច្នៃដោយខ្ញុំបាទផ្ទាល់ មកបង្ហាញនៅលើឆាកអន្តរជាតិដែលមានប្រទេសល្បីៗចូលរួមចំនួន១៦ប្រទេស ហើយជា​លទ្ធផលពិតជាទទួលបាននូវមហាកិត្តិយស TOP FASHION DESIGNER AWARD 2023 ក្នុងកម្មវិធី​Milan Fashion Week មួយនេះសំរាប់ប្រទេសជាតិខ្ញុំ»។

បើតាមលោក Oliva Kong តាមរយៈកម្មវិធីនេះបានបង្ហាញទៅកាន់ពិភពលោកឱ្យបានស្គាល់ពីប្រទេសកម្ពុជា ជាពិសេសទៅលើស្នាដៃកូនខ្មែរ ផ្នែក Designer និង Fashion។

លោក បង្ហាញចំនួន ១៦ឈុត នៅក្នុងកម្មវិធីនេះផងដែរ ដោយរំលេចនូវភាពច្នៃប្រឌិតអំពីស្រ្តីខ្មែរកាលពី ១០០០ឆ្នាំមុន ផ្សារភ្ជាប់ជាមួយបច្ចុប្បន្ននេះ ដើម្បីឆ្លុះបញ្ចាំងពីសម័យកាលមួយទៅសម័យកាលមួយទៀត។

សូមបញ្ជាក់ថា លោក Oliva Kong ទើបតែទទួលបានពានរង្វាន់ Best international designer award 2023 ពីកម្មវិធី Fashion នៅប្រទេសវៀតណាម នាពេលថ្មីៗនេះផងដែរ៕