អ៊ីស្រាអែល សុខចិត្តឱ្យមន្ទីរពេទ្យហ្គាហ្សាក្លាយជាវាលកប់ខ្មោច ​បើក្រុមហាម៉ាស់មិនដោះលែងចំណាប់ខ្មាំង

អ៊ីស្រាអែលបាននិយាយនៅថ្ងៃព្រហស្បតិ៍ ថ្ងៃទី១២ ខែតុលា ថា ខ្លួននឹងមិនមានការលើកលែងផ្នែកមនុស្សធម៌ចំពោះការឡោមព័ទ្ធតំបន់ហ្គាហ្សាស្ទ្រីបឡើយ រហូតទាល់តែចំណាប់ខ្មាំងទាំងអស់ត្រូវបានដោះលែង បើទោះបីមន្ត្រីជាន់ខ្ពស់អង្គការកាកបាទក្រហមបានអង្វរសុំឱ្យមានការអនុញ្ញាតិនាំចូលប្រេងឥន្ធនៈ ដើម្បីការពារមន្ទីរពេទ្យដែលកំពុងប្រែក្លាយទៅជាវាលកប់ខ្មោច។

អ៊ីស្រាអែលបានប្តេជ្ញាបំផ្លាញចលនាហាម៉ាស់ដោយការគ្រប់គ្រងតំបន់ហ្គាហ្សាស្ទ្រីប​ ដើម្បីសងសឹកចំពោះការវាយប្រហារដ៏សាហាវបំផុតលើជនជាតិយូដា រហូតបណ្ដាលឱ្យមានការសម្លាប់រង្គាលនៅតាមទីប្រជុំជនអ៊ីស្រាអែល កាលពីថ្ងៃសៅរ៍សប្ដាហ៍មុន។

ទូរទស្សន៍សាធារណៈ Kan បាននិយាយថា ចំនួនអ្នកស្លាប់របស់អ៊ីស្រាអែលបានកើនឡើងជាង ១,៣០០នាក់ ចាប់តាំងពីថ្ងៃសៅរ៍មក ហើយភាគ​ច្រើន​ជា​ជន​ស៊ីវិល​ត្រូវ​បាន​គេ​បាញ់​សម្លាប់​នៅ​តាម​ផ្ទះ​របស់​ពួក​គេ នៅ​តាម​ដង​ផ្លូវ និងនៅ​ក្នុង​ពិធី​ជប់លៀង​។ ពេលនេះចំណាប់ខ្មាំង​អ៊ីស្រាអែល និង​បរទេស​ជាច្រើន​នាក់​ត្រូវ​បាន​ចាប់​ខ្លួនទៅ​តំបន់​ហ្គាហ្សា​។

ការសម្លាប់រង្គាលបានកើតឡើងក្នុងរយៈពេលប៉ុន្មានថ្ងៃចុងក្រោយនេះ បន្ទាប់ពីកងកម្លាំងអ៊ីស្រាអែលដណ្តើមបានការគ្រប់គ្រងទីក្រុងមកវិញ ដោយបានរកឃើញផ្ទះសម្បែងមួយចំនួនរណូករណែលដោយសាកសព រួមទាំងស្ត្រីដែលត្រូវបានរំលោភ សម្លាប់ ព្រមទាំងកុមារដែលត្រូវបានបាញ់ និងដុតសម្លាប់។

រហូតមកដល់ពេលនេះ ប្រជាជនចំនួន ២.៣លាននាក់នៅតំបន់ហ្គាហ្សាកំពុងស្ថិតនៅក្រោមការឡោមព័ទ្ធទាំងស្រុងរបស់អ៊ីស្រាអែល ហើយអ៊ីស្រាអែលបានចាប់ផ្តើមយុទ្ធនាការទម្លាក់គ្រាប់បែកយ៉ាងធ្ងន់ធ្ងរបំផុតក្នុងប្រវត្តិសាស្ត្រ ៧៥ ឆ្នាំនៃជម្លោះអ៊ីស្រាអែល និងប៉ាឡេស្ទីន។

អាជ្ញាធរហ្គាហ្សាបាននិយាយថា មនុស្សជាង ១,២០០នាក់ត្រូវបានសម្លាប់ និងជាង ៥,០០០នាក់បានរងរបួសនៅក្នុងការបំផ្ទុះគ្រាប់បែក។ ស្ថានីយអគ្គិសនីតែមួយគត់ត្រូវបានបិទ ហើយមន្ទីរពេទ្យកំពុងអស់ប្រេងឥន្ធនៈសម្រាប់ម៉ាស៊ីនភ្លើងសង្គ្រោះបន្ទាន់។

លោក Fabrizio Carboni នាយកតំបន់នៃគណៈកម្មាធិការអន្តរជាតិរបស់អង្គការកាកបាទក្រហមបានធ្វើសេចក្តីថ្លែងការណ៍ស្នើឱ្យមានការលើកលែងចំពោះជនស៊ីវិលនៅតំបន់ហ្គាហ្សា ជាពិសេសថាមពលផ្គត់ផ្គង់មន្ទីរពេទ្យ ដោយសារទារកទើបនឹងកើត និងអ្នកជំងឺវ័យចំណាស់កំពុងខ្វះអុកស៊ីសែន។ ចំណែកការលាងឈាម តម្រងនោម និងការថតកាំរស្មី X មិនអាចដំណើរការបានឡើយ។

លោក Israel Katz

ទោះបីមានការស្នើសុំយ៉ាងណា​ រដ្ឋមន្ត្រីថាមពលអ៊ីស្រាអែល លោក Israel Katz បាននិយាយថា នឹងមិនមានករណីលើកលែងចំពោះការឡោមព័ទ្ធឡើយ ប្រសិនបើចំណាប់ខ្មាំងអ៊ីស្រាអែលមិនត្រូវបានដោះលែងនោះទេ៕

ប្រែសម្រួល៖ សន្យា

ប្រភព៖ CNA

ចុចអាន៖ មន្ទីរពេទ្យនៅហ្គាហ្សា កំពុងក្លាយជាវាលកប់ខ្មោច ក្រោយអ៊ីស្រាអែល កាត់ផ្តាច់អគ្គិសនី