ព័ត៌មានជាតិ

មកដឹងប្រវត្តិខ្លះៗពីព្រលានយន្តហោះសៀមរាបចាស់ ក្រោយបិទទ្វារជាផ្លូវការ

បានផុស

៣ years មុន

នៅ

ថ្ងៃអង្គារ ១៧ តុលា ២០២៣

ដោយ

យោងតាមឯកសារស្រាវជ្រាវព្រលានយន្តហោះអន្តរជាតិសៀមរាបចាស់ បានបើកដំណើរការដំបូងនៅឆ្នាំ ១៩៣២ ក្នុងសម័យអាណានិគមបារំាង និងបានកែលម្អបន្ថែមក្នុងសម័យសង្គមរាស្ត្រនិយមឆ្នាំ១៩៥៥។

នៅឆ្នាំ១៩៧០ ព្រលានយន្តហោះអន្តរជាតិសៀមរាប ក៏បានបិទទ្វារដោយសារសង្រ្គាមស៊ីវិល ហើយបានបើកដំណើរការទ្បើងវិញម្តងទៀតក្នុងឆ្នាំ២០០៦ រហូតមកដល់បច្ចុប្បន្ន។

ឆ្នាំ ២០០៥ ព្រលានយន្តហោះខេត្តសៀមរាបបានធ្វើការអភិវឌ្ឍជាលើកចុងក្រោយ ដើម្បីលើកស្ទួយសមត្ថភាពរបស់ខ្លួនឲ្យមានលទ្ធភាពអាចចុះចតបានចាប់ពីប្រភេទយន្តហោះតូចរហូតដល់យន្តហោះធំៗប្រភេទ Boeing 737 និង Airbus A320 ជាដើម។

ព្រលានយន្តហោះសៀមរាបចាស់ តែងតែទទួលបានការកោតសរសើរពីភ្ញៀវទេសចរនៅទូទាំងពិភពលោកថា «ជាព្រលានយន្តហោះតូចច្រឡឹង ស្រស់ស្អាតនៅក្នុងតំបន់» គឺរាប់ទាំងរចនាប័ទ្មសំណង់ ហេដ្ឋារចនាសម្ព័ន្ធទូទៅ និងសេវាកម្មដ៏រស់រវើក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុនផ្ទុះវិបត្តិជំងឺកូវីដ នៅឆ្នាំ ២០១៩ អតីតព្រលានយន្តហោះចាស់នៅក្រុងសៀមរាបទទួលជើងហោះហើរមួយថ្ងៃ ១០០ ជើង។ បច្ចុប្បន្នចលនាជើងហោះហើរប្រចាំថ្ងៃមានត្រឹម ៣៤ ជើង ឬស្មើ ៣២% នៃឆ្នាំ ២០១៩។

នៅឆ្នាំ ២០១៩ ព្រលានយន្តហោះសៀមរាបទទួលបានអ្នកដំណើរផ្លូវអាកាសចំនួន ៣,៩ លាននាក់ និងទទួលចលនាជើងហោះហើរជិត ៤០ ពាន់ជើង។

ព្រលានយន្តហោះអន្តរជាតិក្រុងសៀមរាប បានប្រកាសបិទទ្វារឈប់ទទួលជើងហោះហើរជាផ្លូវការចាប់ពីម៉ោង ១២ យប់ថ្ងៃទី ១៥ ខែតុលា ឆ្នាំ២០២៣។ ការបិទទ្វារអាកាសយានដ្ឋានអន្តរជាតិសៀមរាបចាស់ ធ្វើឡើងក្រោយពីរាជរដ្ឋាភិបាលកម្ពុជា សម្រេចដាក់ឱ្យដំណើរការជាផ្លូវការអាកាសយានដ្ឋានអន្តរជាតិសៀមរាបអង្គរថ្មីនៅថ្ងៃទី១៦ ខែតុលា ឆ្នាំ ២០២៣។

លោក ស៊ីន ចាន់សេរីវុត្ថា អ្នកនាំពាក្យអាកាសចរស៊ីវិលបានបញ្ជាក់ថា តាមសេចក្តីសម្រេច ស.ជ.ណ របស់រដ្ឋាភិបាល អាកាសយានដ្ឋានអន្តរជាតិសៀមរាបចាស់នឹងត្រូវប្រគល់ឱ្យក្រុមហ៊ុន Angkor International Airport Investment (AIAI) ជាអ្នកគ្រប់គ្រងបន្ត។ ដោយឡែកការសម្រេចចិត្តរបស់ក្រុមហ៊ុនយកទៅអភិវឌ្ឍធ្វើអ្វីនោះ គឺជាការសម្រេចរបស់ក្រុមហ៊ុន ប៉ុន្តែក៏ត្រូវពិគ្រោះយោបល់ជាមួយរដ្ឋាភិបាលជាមុនផងដែរ។

គួរបញ្ជាក់ថា ក្រុមហ៊ុន Cambodia Airports ជាសាខាមួយរបស់ក្រុមហ៊ុន VINCI Airports ដែលប្រតិបត្តិការគ្រប់គ្រងអាកាសយានដ្ឋានអន្តរជាតិទាំង ៣ នៅកម្ពុជាគឺ ភ្នំពេញ សៀមរាប និងក្រុងព្រះសីហនុ។

ជាមួយនឹងវត្តមានធ្វើប្រតិបត្តិការអស់ជាង ២០ ឆ្នាំ ក្រុមហ៊ុនបានវិនិយោគទឹកប្រាក់ប្រមាណ ៥០០ លានដុល្លារអាមេរិក លើការអភិវឌ្ឍអាកាសយានដ្ឋានទាំង ៣ នៅកម្ពុជា ដោយកែលម្អហេដ្ឋារចនាសម្ព័ន្ធស្របតាមការអភិវឌ្ឍរីកចម្រើននៃវិស័យអាកាសចររបស់ប្រទេសកម្ពុជា៕