នាយករដ្ឋមន្ត្រី ចង់ឃើញភាពជាដៃគូរវាងរដ្ឋ និងឯកជនកាន់តែពង្រឹង ក្រោមពាក្យស្លោក រួមគិត រួមធ្វើ រួមទទួលខុសត្រូវ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ចង់ឃើញភាពជាដៃគូរវាងរដ្ឋ និងឯកជន កាន់តែពង្រឹង ក្រោមពាក្យស្លោក រួមគិត រួមធ្វើ រួមទទួលខុសត្រូវ។

ការចង់ឃើញបែបនេះ គឺបានធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការ មន្ទីរពេទ្យជាតិតេជោសន្តិភាព និងប្រកាសដាក់ឲ្យអនុវត្តជាផ្លូវការនូវកម្មវិធីទី ១ នៃគោលនយោបាយជាអាទិភាពទាំង ៦ គឺការពង្រីកវិសាលភាពមូលនិធិសមធម៌ ដល់គ្រូសារងាយរងហានិភ័យ នាព្រឹកថ្ងៃទី ២៤ ខែតុលា ឆ្នាំ ២០២៣។   

សម្ដេចធិបតី ហ៊ុន ម៉ាណែត មាន​ប្រសាសន៍ថា វិស័យឯកជន និងរដ្ឋ គឺជាដៃគូ មិនមែនជាសត្រូវនោះទេ ហើយសម្ដេចចង់ឃើញ ភាពជាដៃគូរវាងរដ្ឋ និងឯកជន កាន់តែត្រូវបានពង្រឹងបន្ថែមទៀត។

សម្ដេចនាយករដ្ឋមន្ត្រី មានប្រសាសន៍បែបនេះថា «អញ្ចឹងវិស័យឯកជន និងរដ្ឋ គឺជាដៃគូ មិនមែនជាសត្រូវទេ ហើយក្នុងវិស័យសុខាភិបាល ក្នុងវិស័យអប់រំ គ្រប់វិស័យទាំងអស់ រដ្ឋជាដៃគូ ហើយខ្ញុំចង់ឃើញភាពជាដៃគូរវាងរដ្ឋ និងឯកជន កាន់តែពង្រឹង ក្រោមពាក្យស្លោក រួមគិត រួមធ្វើ រួមទទួលខុសត្រូវ»។

សម្ដេចធិបតី ហ៊ុន ម៉ាណែត បានបញ្ជាក់ថា ភាពជាដៃគូនេះ មិនមែនគ្រាន់តែរួមគិត ហើយលើកសំណើនោះទេ តែត្រូវរួមធ្វើផង ​និងរួមទទួលខុសត្រូវផង៕