រដ្ឋបាលខេត្តកំណ្ដាលទទូចកុំឱ្យម្ចាស់ផ្ទះសំណាក់ដំឡើងថ្លៃបន្ទប់ស្នាក់នៅចំថ្ងៃប្រឡងបាក់ឌុប

រដ្ឋបាលខេត្តនៅថ្ងៃទី ០១ ខែវិច្ឆិកា ឆ្នាំ ២០២៣ បានអំពាវនាវឱ្យម្ចាស់សណ្ឋាគារ ផ្ទះសំណាក់ ផ្ទះជួល និងម្ចាស់ភោជនីយដ្ឋានកុំដំឡើងថ្លៃសេវា និងពិនិត្យលទ្ធភាពបញ្ចុះថ្លៃជូនលោកគ្រូ អ្នកគ្រូ និងបេក្ខជនប្រឡងបាក់ឌុប។

ក្រសួងអប់រំ នឹងរៀបចំការប្រឡងសញ្ញាបត្រមធ្យមសិក្សាទុតិយភូមិទូទាំងប្រទេសនៅថ្ងៃទី ៦-៧ ខែវិច្ឆិកា សប្ដាហ៍ក្រោយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋបាលខេត្តកណ្ដាលបានរៀបចំមណ្ឌលប្រឡងនៅតាមក្រុង និងស្រុកចំនួន ៤ រួមាន៖ ក្រុងតាខ្មៅ ស្រុកស្អាង ស្រុកកណ្ដាលស្ទឹង និងស្រុកកៀនស្វាយ ដែលជាហេតុតម្រូវឱ្យគ្រូ អាណាព្យាបាល និងបេក្ខជនប្រឡងត្រូវមកស្នាក់នៅសណ្ឋាគារ ផ្ទះសំណាក់ ឬបន្ទប់ជួលនៅមូលដ្ឋានខាងលើ។

រដ្ឋបាលខេត្តកណ្ដាលបញ្ជាក់ថា៖ «ក្នុងន័យនេះ រដ្ឋបាលខេត្តកណ្ដាលសូមអំពាវនាវដល់ម្ចាស់សណ្ឋាគារ ផ្ទះសំណាក់ បន្ទប់ជួល និងភោជនីយដ្ឋាន អាហារដ្ឋានគ្រប់ប្រភេទ សូមរក្សាតម្លៃ និងគុណភាពសេវាកម្មទាំងអស់ឱ្យនៅដដែល ដោយពុំដំឡើងថ្លៃបន្ទប់ស្នាក់នៅ ឬអាចពិនិត្យលទ្ធភាពបញ្ចុះតម្លៃជូនលោកគ្រូ អ្នកគ្រូ អាណាព្យាបាល និងបេក្ខជនប្រឡងតាមការគួរ»៕