កម្ពុជា-សិង្ហបុរី ចុះ MOU ចៀសវាងការយកពន្ធ​ត្រួតគ្នា និងការបង្ការការកិបកេង​បន្លំ​ពន្ធពាក់ព័ន្ធប្រាក់ចំណូល

កម្ពុជា និងសិង្ហបុរី បានចុះហត្ថលេខាលើ “ពិធីសារទី ២” ដើម្បីធ្វើវិសោធនកម្មលើកិច្ចព្រមព្រៀងរវាង រាជរដ្ឋាភិបាល​ប្រទេស​ទាំងពីស្តីពី “ការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធ ពាក់ព័ន្ធនឹងពន្ធ លើប្រាក់ចំណូល (Double Taxation Agreement-DTA)”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីប្រកាសព័ត៌មាន បានបញ្ជាក់ថា “ពិធីសារទី ២ នេះ ត្រូវបានចុះហត្ថលេខាដោយលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងនាមរាជរដ្ឋាភិបាលកម្ពុជា និងលោកស្រី Teo Lay Cheng ឯកអគ្គរដ្ឋទូតវិសាមញ្ញនិងពេញសមត្ថភាពនៃសាធារណរដ្ឋសិង្ហបុរីប្រចាំព្រះរាជាណាចក្រកម្ពុជា ក្នុងនាម រដ្ឋាភិបាលសិង្ហបុរី ។

គោលបំណងនៃការរៀបចំឱ្យមាន ”ពិធីសារទី ២ នេះ គឺដើម្បីធ្វើវិសោធនកម្មទៅលើកិច្ចព្រមព្រៀង DTA កម្ពុជា-សិង្ហបុរី ឱ្យមានសង្គតិភាពជាមួយបទដ្ឋានអន្តរជាតិ ដែលត្រូវបានវិវត្តចុងក្រោយ ជាពិសេសនៅក្រោម ក្របខ័ណ្ឌបរិយា​ប័ន្នរបស់​អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) សម្រាប់ប្រឈមនឹងការបន្ថយ មូលដ្ឋានគិតពន្ធ និងការបង្វែរ​ប្រាក់ចំណេញ (Base Erosion and Profit Shifting-BEPS) ។

សូមរំលឹកថា “កិច្ចព្រមព្រៀង DTA កម្ពុជា-សិង្ហបុរី” ត្រូវបានចុះហត្ថលេខានៅថ្ងៃទី ២០ ខែ មេសា ឆ្នាំ ២០១៦ ហើយបានចូលជាធរមាន និងមានប្រសិទ្ធភាពអនុវត្តចាប់តាំងពីថ្ងៃទី ០១ ខែ មករា ឆ្នាំ ២០១៨ ។

គិតត្រឹមរយៈពេល ៩ខែ ឆ្នាំ ២០២៣ កម្ពុជា និងសិង្ហបុរី មានទំហំពាណិជ្ជកម្មប្រមាណជាង៧២៣លានដុល្លារដុល្លារ កើនឡើង ១២.៥ភាគរយ បើធៀបនឹងរយៈពេលដូចគ្នាកាលពីឆ្នាំ ២០២២ មានចំនួនជាង ៦៤៣លានដុល្លារ។ ក្នុងការនាំចេញរបស់កម្ពុជា ទៅកាន់សិង្ហបុរី សម្រេចបានជាង ៣៣លានដុល្លារ និងនាំចូលមកវិញមានចំនួនជាង ៦៩០លានដុល្លារអាមេរិក៕