កម្ពុជា–សិង្ហបុរី ពង្រឹងកិច្ចសហប្រតិបត្តិការប្រឆាំងការឆបោកតាមប្រព័ន្ធបច្ចេកវិទ្យា

នាព្រឹកថ្ងៃទី២៧ ខែមេសា ឆ្នាំ២០២៦ លោកសន្តិបណ្ឌិត ឆៃ ស៊ីណារិទ្ធ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានលេខាធិការដ្ឋាន គ.ប.ឆ.ប. បានអនុញ្ញាតឱ្យ លោក Steven Pang Chee Wee ឯកអគ្គរដ្ឋទូតសិង្ហបុរីប្រចាំកម្ពុជា ចូលជួបសម្តែងការគួរសម និងពិភាក្សាការងារ។

ក្នុងជំនួបនេះ លោក ឆៃ ស៊ីណារិទ្ធ បានជម្រាបជូនអំពីយន្តការ និងលិខិតបទដ្ឋានគតិយុត្តរបស់កម្ពុជា ក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ជាពិសេសតួនាទីរបស់ គ.ប.ឆ.ប. និងច្បាប់ថ្មីពាក់ព័ន្ធ ដែលជាឧបករណ៍សំខាន់ក្នុងការបង្ក្រាបក្រុមឧក្រិដ្ឋជន ទាំងមេខ្លោង អ្នកសមគំនិត និងអ្នកពាក់ព័ន្ធ ដើម្បីសម្អាតបណ្តាញឧក្រិដ្ឋកម្មឱ្យដល់ឬសគល់ និងទប់ស្កាត់មិនឱ្យកើតឡើងវិញ។

លោកក៏បានលើកឡើងពីទិសដៅបន្ត និងសារៈសំខាន់នៃកិច្ចសហប្រតិបត្តិការជាមួយបណ្តាប្រទេស និងភាគីពាក់ព័ន្ធ ដើម្បីរួមគ្នាស្រាវជ្រាវ ស៊ើបអង្កេត និងបង្ក្រាបបណ្តាញឧក្រិដ្ឋកម្មឆ្លងដែន រួមមាន ការលាងសម្អាតប្រាក់ និងជួញដូរមនុស្ស ឱ្យមានប្រសិទ្ធភាព និងចីរភាព។

ជាការឆ្លើយតប ឯកអគ្គរដ្ឋទូតសិង្ហបុរី បានសម្តែងការកោតសរសើរចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា និងទទួលស្គាល់ថា ការឆបោកតាមប្រព័ន្ធបច្ចេកវិទ្យា ជាបញ្ហាសកលដែលត្រូវការកិច្ចសហប្រតិបត្តិការយ៉ាងជិតស្និទ្ធ។ លោកក៏បានគាំទ្រការបង្កើត គ.ប.ឆ.ប. និងការអនុវត្តច្បាប់ថ្មី ដែលបង្ហាញពីការតាំងចិត្តច្បាស់លាស់របស់កម្ពុជា។

សិង្ហបុរីក៏បានបញ្ជាក់ពីការត្រៀមខ្លួនក្នុងការគាំទ្រកម្ពុជា តាមរយៈការកសាងសមត្ថភាពមន្ត្រី ការចែករំលែកព័ត៌មាន និងបទពិសោធន៍ ព្រមទាំងការអនុវត្តសកម្មភាពរួមនានា។

ជាទីបញ្ចប់ ភាគីទាំងពីរបានផ្លាស់ប្តូរយោបល់ និងគំនិតផ្តួចផ្តើម ពាក់ព័ន្ធទិសដៅកិច្ចសហប្រតិបត្តិការ ទាំងកម្រិតទ្វេភាគី និងពហុភាគី ក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា៕