អ្នកនាំពាក្យ ៖ អាកាសយានដ្ឋានអន្តរជាតិ​សៀមរាបអង្គរ​កើនភ្ញៀវទេសចរដល់ ៣២០០នាក់ ក្នុងមួយ​ថ្ងៃ

គិតត្រឹមថ្ងៃទី ០៦ ខែ វិច្ឆិកានេះ អាកាសយានដ្ឋានអន្តរជាតិសៀមរាបអង្គរ ទទួលបានភ្ញៀវទេសចរកើនឡើងពី ២៦០០​នាក់ ទៅ ៣២០០នាក់ ក្នុងមួយថ្ងៃ។ នេះបើតាមការបញ្ជាក់របស់លោក ស៊ីន ចាន់សេរីវុត្ថា អនុរដ្ឋលេខាធិការ និងជាអ្នកនាំពាក្យនៃលេខាធិការដ្ឋានអាកាសចរស៊ីវិលកម្ពុជា។

លោក ស៊ីន ចាន់សេរីវុត្ថា បានគូសបញ្ជាក់ថា ការវិលត្រឡប់របស់ភ្ញៀវទេសចរអន្តរជាតិចូលកម្ពុជា នាពេលនេះ មានកំណើនមធ្យម ដោយភាគច្រើន មកពីតំបន់អាស៊ាន និងចិន។ ដោយក្នុងនោះ ភ្ញៀវចម្រុះជាតិសាសន៍​មកពីតំបន់អាស៊ាន មានប្រមាណ ៧៥ភាគរយ និងពីតំបន់អឺរ៉ុបមានចំនួន ២៥ភាគរយ។

អ្នកនាំពាក្យអាកាសចរស៊ីស៊ីវិល រំពឹងថា ចំនួនជើងហោះហើរនឹងកើនដល់៤២ជើង ក្នុងមួយថ្ងៃ (ទ្វេទិស) នៅរដូវរងា (Winter) ២០២៣ នេះ។

បើតាមលោក ស៊ីន ចាន់សេរីវុត្ថា បច្ចុប្បន្ននេះ មានក្រុមហ៊ុនចំនួន ៧ កំពុងដំណើរការហោះហើរ រួមមាន ក្រុមហ៊ុន Cambodia Ankor Air, ក្រុមហ៊ុន Thai AirAsia, ក្រុមហ៊ុន Bangkok Airways, ក្រុមហ៊ុន Thai Smile Airways, ក្រុមហ៊ុន Singapore Airlines , ក្រុមហ៊ុន Vietnam Airlines និងក្រុមហ៊ុន Lao Airlines។

បន្ថែមលើនេះ លោក ស៊ីន ចាន់សេរីវុត្ថា បានលើកឡើងថា អាកាសចរស៊ីវិល សង្ឃឹមថា ក្រុមហ៊ុនហោះហើរ នឹងមានការ​កើនឡើងដល់ ៩-១០ ក្រុមហ៊ុន នៅក្នុងរដូវកាល Winter ក្នុងសប្តាហ៍បន្តបន្ទាប់ខាងមុខ។

សូមបញ្ជាក់ថា គិតត្រឹមថ្ងៃទី ០៦ ខែ វិច្ឆិកានេះ អាកាសយានដ្ឋានអន្តរជាតិអង្គរសៀមរាប បានដាក់ឱ្យដំណើរ​ការជាផ្លូវការ រយៈពេល ២០ថ្ងៃហើយ ពោលគឺចាប់ពីថ្ងៃទី ១៦ ខែតុលាមក។

អាកាសយានដ្ឋានអន្តរជាតិសៀមរាប-អង្គរ គឺជាអាកាសយានដ្ឋានអន្តរជាតិលំដាប់ 4E ជាមួយផ្លូវបត់រត់ប្រវែង ៣,៦០០​ម៉ែត្រ លើទុនវិនិយោគ ១,១ពាន់លានដុល្លារ មានសមត្ថភាពឲ្យយន្តហោះគ្រប់ប្រភេទចុះចតបាន ដោយបំពាក់បច្ចេក​វិទ្យាថ្មីបំផុត សម្រាប់សុវត្ថិភាព និងសន្តិសុខ​ដល់អ្នកដំណើរ។ អាកាសយានដ្ឋានមានចំណតយន្តហោះរហូតដល់ទៅ ៣៨ ដោយមានសមត្ថភាព​ទទួលអ្នកដំណើរប្រមាណ ៧លាននាក់ក្នុងមួយឆ្នាំ។ នៅក្នុងដំណាក់កាលទី២ អាចទទួល​អ្នកដំណើរដល់ ១០លាននាក់​ក្នុងមួយឆ្នាំ ហើយដំណាក់​កាលទី៣ អាចទទួលអ្នកដំណើរបានរហូតដល់ ២០លាននាក់​នៅក្នុងមួយឆ្នាំ។

តាមការគ្រោងទុក អាកាសយានដ្ឋាននេះ នឹងបើកសម្ពោធជាផ្លូវការនៅថ្ងៃទី ១៦ ខែវិច្ឆិកា ខាងមុខ ក្រោមអធិបតី​ភាពសម្តេច ហ៊ុន ម៉ាណែត នាយករដ្ឋមន្រ្តីកម្ពុជា៕