ចង់បើកភោជនីយដ្ឋានខ្នាតតូចជោគជ័យអាចត្រៀម ៦ ចំណុចនេះ

ភោជនីយដ្ឋានខ្នាតតូច ឬអាហារដ្ឋាន កំពុងមានតម្រូវការកើនឡើងគ្រប់ទិសទី។ មនុស្សកាន់តែរវល់ ពួកគេឧស្សាហ៍ចេញញ៉ាំអាហារក្រៅញឹកញាប់​ ដែលជាអំណោយផលល្អដល់អ្នកលក់អាហារទាំងខ្នាតធំនិងតូច។

ប្រសិនបើលោកអ្នកមានបំណងចង់រកស៊ី ដោយបើកភោជនីយដ្ឋានខ្នាតតូច សូមអត្ថបទនេះដើម្បីជាជំនួយសម្រាប់ត្រៀមខ្លួន!

១. រសជាតិអាហារ

គ្រប់ភោជនីយដ្ឋានដែលអាចជោគជ័យបាន លុះត្រាតែចុងភៅមានថ្វីដៃពូកែ ចម្អិនម្ហូបដែលត្រូវមាត់ភ្ញៀវភាគច្រើន ដោយចុងភៅនោះអាចជាម្ចាស់ផ្ទាល់ ឬជួលចុងភៅជំនាញណាម្នាក់មកជួយ។

២. អនាម័យល្អ

ទោះជាម្ហូបឆ្ងាញ់យ៉ាងណាក៏ដោយ បើអនាម័យមិនស្អាត អ្នកញ៉ាំប្រាកដជាចូលម្ដងហើយ លែងមកទៀត។ ការចម្អិនម្ហូបស្អាត បរិយាកាសក្នុងហាងល្អ និងមានអនាម័យក្នុងបន្ទប់ទឹក សុទ្ធតែជាចំណុចដែលភ្ញៀវកត់សម្គាល់ និងជាអ្វីដែលម្ចាស់ហាងត្រូវកែកុន។

៣. ស្គាល់រសនិយមអតិថិជន

ហាងអាហារទទួលបានការគាំទ្រ ត្រូវចេះកែច្នែមុខម្ហូបថ្មីៗបន្ថែម ហើយជម្រុះចោលនូវមុខម្ហូបចាស់ៗដែលមិនសូវមានការចូលចិត្ត។ ត្រូវស្វែងយល់ពីរសនិយមអតិថិជន រួចយកមកកែច្នៃមកធ្វើជាមុខម្ហូបរបស់ហាង។

៤. ទីតាំងភោជនីយដ្ឋាន

ទីតាំងហាង ក៏ជាចំណុចសំខាន់ដែរ ព្រោះបើរកកន្លែងបាននៅទីប្រជុំជនរឹតតែអំណោយផលល្អ។ ប៉ុន្តែក៏ត្រូវមើលដែរថា ភោជនីយដ្ឋានថ្មីមានគូប្រកួតប្រជែងក្បែរគ្នាច្រើនដែរឬអត់ ដើម្បីត្រៀមខ្លួនរៀបចំហាងដែលអាចប្រណាំងប្រជែងជាមួយដៃគូ។

៥. សម្ភារៈប្រើប្រាស់ល្អ

បើសម្រេចថា ចង់រកស៊ីបើកហាងមួយទៅហើយ គួរហ៊ានចំណាយប្រាក់ខ្លះទៅលើសម្ភារៈប្រើប្រាស់មានគុណភាពល្អដូចជា សម ស្លាបព្រា ចង្កឹះ ចាន ទឹកម្ទេស ទឹកស៊ីអ៊ីវ គ្រឿងទេសជាដើម សម្រាប់ឲ្យភ្ញៀវមានទំនុកចិត្ត។

៦. ប្រព័ន្ធគ្រប់គ្រង

ភោជនីយដ្ឋានជោគជ័យបាន ត្រូវការចំណែកសំខាន់មួយទៀតនោះគឺ ប្រព័ន្ធគ្រប់គ្រងច្បាស់លាស់។ ប្រព័ន្ធគ្រប់គ្រងល្អត្រូវគិតគូរលើការសេវាកម្មបម្រើភ្ញៀវ ភាររបស់បុគ្គលិក និងចំណាយ-ចំណូលហិរញ្ញវត្ថុ ។ល៕

ប្រែសម្រួល៖ សន្យា

ប្រភព៖ CNBC