ក្រឡាប់រថយន្តសាំងយ៉ុងមួយគ្រឿង​ ចេញសុទ្ធតែ​ពពែរស់ ច្រកការុង​ សង្ស័យលួចនាំចូលពីថៃ

ពពែរស់រាប់សិបក្បាលត្រូវបានខ្ទាត់ចេញពីក្នុងរថយន្តសាំយ៉ុងមួយគ្រឿង បន្ទាប់ពីក្រឡាប់ធ្លាក់ទៅលើចិញ្ចើមផ្លូវជាតិលេខ៥ ស្ថិតក្នុងភូមិសុរិយាថ្ម ឃុំកូប ស្រុកអូរជ្រៅ ខេត្តបន្ទាយមានជ័យកាលពីព្រលឹមថ្ងៃទី ៧ ធ្នូ ២០២៣។សត្វពពែទាំងអស់ខាងលើសង្ស័យលួចនាំចូលពីប្រទេសថៃយកទៅចែកចាយតាមខេត្តនានា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពពីប្រជាពលរដ្ឋប្រាប់ថា នៅពេលគ្រោះថ្នាក់ចរាចរណ៍កើតឡើង មានរថយន្តសាំយ៉ុងមួយគ្រឿង បើកបរតាមបណ្តោយផ្លូវជាតិលេខ៥ មិនដឹងមូលហេតុអ្វីក៏រេចង្កូតធ្លាក់ចិញ្ចើមផ្លូវបណ្តាលឱ្យក្រឡាប់ផ្ងារជើងចេញមកសុទ្ធតែពពែច្រកការុងឃើញតែក្បាលព្រាត។

ដោយឡែកបើតាមអ្នកបើកបររថយន្តខាងលើបានឱ្យដឹងថា មូលហេតុដែលក្រឡាប់រថយន្ត គឺរថយន្តបែកកង់មុខខាងស្តាំបណ្តាលឱ្យទាញចង្កូតធ្លាក់ផ្លូវក្រឡាប់តែគ្មានរងគ្រោះថ្នាក់ដល់អ្នកដទៃឡើយ ក្រៅតែខូចខាតរថយន្ត ហើយនឹងងាប់ពពែជាច្រើនក្បាល។

ក្រៅពីមូលហេតុនៃការក្រឡាប់ខាងលើតៃកុងរថយន្តមិនបានប្រាប់ថា សត្វពពែដែលរថយន្តបានដឹកថា នាំចូលពីណា ឬប្រភពមកពីណាមានច្បាប់ ឬអត់នោះទេ ប៉ុន្តែបើតាមប្រភពខ្លះបាននិយាយថា រថយន្តសាំយ៉ុងដែលក្រឡាប់ចេញពពែនេះ អាចនឹងដឹកចេញពីច្រកព្រំដែនកម្ពុជា-ថៃដោយខុសច្បាប់ ចូលមកចែកចាយក្នុងខេត្តបន្ទាយមានជ័យ ព្រោះ​បើដឹក​ពីកសិដ្ឋានគួរតែមានការបញ្ជាក់ច្បាស់ពីទីតាំងកសិដ្ឋាននោះ ស្ថិតនៅកន្លែងណាមួយរបស់ខេត្ត ប៉ុន្តែតៃកុងរថយន្តបែរជាមិនអាចបញ្ជាក់ឈ្មោះកសិដ្ឋានរបស់ខ្លួនឡើយ។ ទោះបីជាយ៉ាងណាក៏ដោយករណីនេះមិនឃើញមានសមត្ថកិច្ចណាចុះមកពិនិត្យឡើយ៕

អត្ថបទ៖ អពៅ