ព័ត៌មានជាតិ

ឆ្នាំ២០២៤ រាជរដ្ឋាភិបាលកម្ពុជា គ្រោងផ្ទេរថវិកាទៅថ្នាក់ក្រោមជាតិ ១,៧ពាន់លានដុល្លារ

បានផុស

២ years មុន

នៅ

ថ្ងៃចន្ទ ១១ ធ្នូ ២០២៣

ដោយ

នៅក្នុងឆ្នាំ២០២៤ ខាងមុខនេះ រាជរដ្ឋាភិបាលកម្ពុជា គ្រោងផ្ទេរកញ្ចប់ថវិកា១,៧ពាន់លានដុល្លារ ដែលស្មើនឹងប្រមាណ ២០% នៃថវិកាជាតិសរុបទៅកាន់ថ្នាក់ក្រោមជាតិ។ នេះបើតាមការបង្ហើបឱ្យដឹងរបស់លោក ចាន់ សុធា អនុរដ្ឋលេខាធិការក្រសួងមហាផ្ទៃ។

ការផ្ទេរថវិកាទៅថ្នាក់ក្រោមជាតិនេះ ដើម្បីធានាដល់ការបង្កើនធនធានហិរញ្ញវត្ថុរបស់រដ្ឋបាលថ្នាក់ក្រោមជាតិ រួមទាំងធនធានហិរញ្ញវត្ថុជាឆន្ទានុសិទ្ធិ និងធនធានហិរញ្ញវត្ថុមានភ្ជាប់លក្ខខណ្ឌ ព្រមទាំង បន្តកែលម្អប្រព័ន្ធ និងសមត្ថភាពគ្រប់គ្រងហិរញ្ញវត្ថុរបស់រដ្ឋបាលថ្នាក់ក្រោមជាតិ ដើម្បីធានាឱ្យរដ្ឋបាលថ្នាក់ក្រោមជាតិមានធនធានហិរញ្ញវត្ថុ និងសមត្ថភាពសមស្របក្នុងការគ្រប់គ្រង ចាត់ចែង និងប្រើប្រាស់ធនធានហិរញ្ញវត្ថុទាំងនោះក្នុងការដោះស្រាយបញ្ហាប្រឈម ការផ្តល់សេវាសាធារណៈ និងការអភិវឌ្ឍមូលដ្ឋាន ឆ្លើយតបទៅនឹងតម្រូវការរបស់ប្រជាពលរដ្ឋក្នុងដែនសមត្ថកិច្ចរបស់ខ្លួនប្រកបដោយប្រសិទ្ធភាព។ នេះ បើតាមលោក ចាន់ សុធា អនុរដ្ឋលេខាធិការក្រសួងមហាផ្ទៃ។

ជាការកត់សម្គាល់ ការផ្ទេរថវិកាទៅថ្នាក់ក្រោមជាតិនៅក្នុងឆ្នាំ២០២៤ គឺមានទំហំធំជាងឆ្នាំ២០២៣ ដោយក្នុងឆ្នាំ២០២៣ រាជរដ្ឋាភិបាល បានផ្ទេរកញ្ចប់ថវិកាប្រមាណ១,២៥៥លានដុល្លារ ស្មើនឹងប្រមាណជាង១៧%នៃថវិកាជាតិទៅកាន់ថ្នាក់ក្រោមជាតិ៕