ពាក់កណ្តាលឆ្នាំ២០២៤ រោងចក្រដំទ្បើងរថយន្ត Toyota នឹងបើកដំណើរការជាផ្លូវការនៅកម្ពុជា

នៅពាក់កណ្ដាលឆ្នាំ២០២៤ រោងចក្រដំឡើងរថយន្ត តូយ៉ូតា (Toyota) របស់ជប៉ុន នឹងបើកដំណើរការអាជីវកម្មដំឡើងរថយន្តរបស់ខ្លួនជាផ្លូវការនៅក្នុងប្រទេសកម្ពុជា។ បើតាមគម្រោង សម្ដេចធិបតី ហ៊ុន ម៉ាណែត នឹងអញ្ជើញជាអធិបតីក្នុងពិធីបើកសម្ពោធដាក់ឱ្យដំណើរការរោងចក្រដំឡើងរថយន្ត Toyota នេះ។

វត្តមានរោងចក្រដំឡើងរថយន្តដ៏ល្បីឈ្មោះរបស់ជប៉ុននៅក្នុងប្រទេសកម្ពុជាពេលនេះ ផ្អែកលើអនុស្សរណៈនៃការយោគយល់គ្នារវាងរាជរដ្ឋាភិបាលកម្ពុជា និងក្រុមហ៊ុនជប៉ុន Toyota Tsusho Corporation ហើយត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័តសម្រាប់គម្រោងរោងចក្រដំឡើងរថយន្ត Toyota Tsusho Manufacturing (Cambodia) Co., Ltd., (TTMC) កាលពីខែកញ្ញា ឆ្នាំ២០២២។ បើតាមក្រុមប្រឹក្សាអភិវឌ្ឍន៍កម្ពុជា រោងចក្រដំឡើងរថយន្តនេះ មានទីតាំងក្នុងតំបន់សេដ្ឋកិច្ចពិសេសភ្នំពេញ ដែលមានទុនវិនិយោគប្រមាណ ៣៦,៧លានដុល្លារអាមេរិក ហើយរំពឹងថា​ នឹងបង្កើតឱកាសការងារចំនួន១៥០កន្លែងសម្រាប់ប្រជាពលរដ្ឋក្នុងស្រុក។

ក្នុងជំនួបជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅថ្ងៃទី១៩ ខែធ្នូ ឆ្នាំ២០២៣ នៅទីក្រុងតូក្យូ លោក Ichiro KASHITANI សមាជិកក្រុមប្រឹក្សាភិបាល និងជានាយកប្រតិបត្តិក្រុមហ៊ុន Toyota Tsusho Corporation បានជម្រាបជូនសម្ដេចធិបតីអំពីដំណើរការបង្កើតរោងចក្រដំទ្បើងរថយន្ត Toyota នៅកម្ពុជា ដែលបាននិងកំពុងប្រព្រឹត្តទៅយ៉ាងមមាញឹក ដែលនឹងរួចរាល់នាពាក់កណ្តាលឆ្នាំ២០២៤ ខាងមុខ។ ក្នុងឱកាសនោះ លោកនាយកប្រតិបត្តិក្រុមហ៊ុន Toyota ក៏បានសុំការអនុញ្ញាតគោរពអញ្ជើញសម្តេចធិបតី ធ្វើជាអធិបតីក្នុងពិធីសម្ពោធដាក់ឱ្យដំណើរការរោងចក្រដំទ្បើងរថយន្ត Toyota នាពេលខាងមុខផងដែរ។ 

ជាកិច្ចឆ្លើយតប សម្ដេចធិបតី បានទទួលយកការអញ្ជើញជាអធិបតីក្នុងពិធីសម្ពោធដាក់ឱ្យដំណើរការរោងចក្រដំទ្បើងរថយន្ត Toyota នាឆ្នាំ២០២៤ ខាងមុខ ដោយសម្តេចធិបតី លើកទ្បើងថា ការសម្ពោធដាក់ឱ្យដំណើរការរោងចក្រដំទ្បើងរថយន្ត Toyota នាឆ្នាំ២០១៤ គឺស្របពេលខួបអនុស្សាវរីយ៍លើកទី៧១ នៃទំនាក់ទំនងការទូតកម្ពុជា-ជប៉ុន ដែលនេះជាការបញ្ជាក់យ៉ាងច្បាស់អំពីភាពលូតលាស់រីកចម្រើននៃទំនាក់ទំនងរវាងប្រទេសទាំងពីរ។

សម្តេចធិបតី នាយករដ្ឋមន្ត្រី ជឿជាក់ថា តាមរយៈដំណើរការនៃរោងចក្រតំទ្បើងរថយន្ត Toyota នឹងនាំមកនូវវឌ្ឍនភាពរីកចម្រើនសម្រាប់ក្រុមហ៊ុន ក៏ដូចជាការបង្កើតឱកាសការងារប្រកបដោយគុណភាព និងការបណ្តុះបណ្តាលលើកកម្ពស់ ថែមទៀតលើជំនាញវិស្វកម្មរថយន្តសម្រាប់ប្រជាជនកម្ពុជាផងដែរ។

គួរជម្រាបថា ក្រៅពីរោងចក្រដំឡើងរថយន្ត Toyota បច្ចុប្បន្ននេះ កម្ពុជា ក៏មានរោងចក្រដំឡើងរថយន្តចំនួនពីរទៀត គឺ​រោងចក្រដំឡើងរថយន្ត Hyundai នៅខេត្តកោះកុង និងរោងចក្រដំឡើងរថយន្ត Ford នៅខេត្តពោធិ៍សាត់ ជាដើម៕