កីឡា

លោកសេដ្ឋី Jim Ratcliffe យល់ព្រមទិញភាគហ៊ុន២៥%នៅMan Utd

បានផុស

២ years មុន

នៅ

ថ្ងៃចន្ទ ២៥ ធ្នូ ២០២៣

ដោយ

មហាសេដ្ឋីអង់គ្លេសលោក Jim Ratcliffe បានយល់ព្រមទិញភាគហ៊ុនចំនួន ២៥% របស់ក្លិប Manchester United ក្នុងតម្លៃប្រមាណ ១.៣ ពាន់លានដុល្លារ ដើម្បីវិនិយោគ និងធ្វើកំណែទម្រង់ក្លិបឲ្យវិលទៅរកភាពល្អប្រសើរវិញ បន្ទាប់ពីប៉ុន្មានឆ្នាំចុងក្រោយក្លិបនៅទីក្រុង Manchester មិនទទួលបានលទ្ធផលល្អសោះ។

ក្រោយទិញភាគហ៊ុនចំនួន២៥% លោក Ratcliffe នឹងក្លាយជានាយកប្រតិបត្តិបាល់ទាត់ Manchester United។ បុរសវ័យ៧១ឆ្នាំរូបនេះនឹងផ្តល់ប្រាក់៣០០លានដុល្លារ សម្រាប់ការវិនិយោគនាពេលអនាគតនៅកីឡដ្ឋាន Old Trafford។ ការប្រកាសនេះធ្វើឡើងក្នុងរយៈពេល១៣ខែ បន្ទាប់ពីម្ចាស់ក្លិបគ្រួសារ Glazer បាននិយាយថា ពួកគេកំពុងពិចារណាក្នុងការដាក់លក់ក្លិប។ គ្រួសារជនជាតិអាមេរិកបានទិញក្លិប Man Utd ក្នុងតម្លៃ៧៩០លានផោន កាលពីឆ្នាំ២០០៥។ Man Utd បានខកខានក្នុងការឈ្នះពាន Premier League ចាប់តាំងពីឆ្នាំ២០១៣ ខណៈការតវ៉ាជាប្រចាំប្រឆាំងនឹងការកាន់កាប់របស់លោក Glazer ដែលធ្វើឲ្យក្លិបធ្លាក់ចុះ។

ក្នុងសេចក្តីថ្លែងការណ៍មួយ លោក Ratcliffe បាននិយាយថា ៖«យើងនឹងនាំយកចំណេះដឹង ជំនាញ និងទេពកោសល្យសកលពីក្រុម Ineos Sport ដែលមានភាពទូលំទូលាយ មកជួយជំរុញការកែលម្អបន្ថែមទៀតនៅក្លិប។ យើងនៅទីនេះសម្រាប់រយៈពេលវែង ហើយទទួលស្គាល់ថា យើងនឹងមានបញ្ហាប្រឈមជាច្រើន។ យើងនឹងដើរទៅមុខដោយជឿជាក់ វិជ្ជាជីវៈ និងឆន្ទៈខ្ពស់។ យើងប្តេជ្ញាធ្វើការជាមួយមនុស្សគ្រប់គ្នានៅក្នុងក្លិបរួមមានក្រុមប្រឹក្សាភិបាល បុគ្គលិក កីឡាករ និងអ្នកគាំទ្រ ដើម្បីអនាគតក្លិបដ៏រុងរឿង។ មហិច្ឆតារបស់យើងគឺចង់ឃើញ Manchester United ត្រឡប់ទៅកាន់កម្រិតកំពូលនៅអង់គ្លេស អឺរ៉ុប និងពិភពលោក»។

ក្លិប Man Utd បានប្រកាសកិច្ចព្រមព្រៀងនេះគឺស្ថិតក្រោមការយល់ព្រមតាមបទប្បញ្ញត្តិ ប៉ុន្តែសង្ឃឹមថា វានឹងត្រូវបានបញ្ចប់យ៉ាងឆាប់រហ័សតាមអ្វីដែលអាចធ្វើទៅបាន។ ដំណើរការដំបូងត្រូវការពេលពី៦ទៅ៨សប្តាហ៍ដើម្បីផ្ដល់កិច្ចព្រមព្រៀងដែលត្រូវបានផ្តល់សច្ចាប័ន ដែលរួមមានការចុះហត្ថលេខាដោយក្របខណ្ឌ Premier League៕

ប្រែសម្រួល៖ ផា រតនា
ប្រភព៖ BBC