ខេត្តភាគខាងត្បូង ហ្វីលីពីន រងការវាយប្រហារពីគ្រោះរញ្ជួយដីកម្រិត ៧.១ រ៉ិចទ័រ

វិទ្យាស្ថានបន្ទុះភ្នំភ្លើង និងរញ្ជួយដីហ្វីលីពីនបានរាយការណ៍ឲ្យដឹងថា គ្រោះរញ្ជួយដីកម្រិត ៧.១ រ៉ិចទ័របានវាយប្រហារខេត្ត Sarangani រួមជាមួយនឹងខេត្ត Davao Occidental ភាគខាងត្បូងប្រទេសហ្វីលីពីន នៅព្រឹកព្រលឹមថ្ងៃអង្គារនេះ ។

យោងតាមការចុះផ្សាយដោយទីភ្នាក់ងារព័ត៌មានចិន Xinhua បានឲ្យដឹងថា គ្រោះរញ្ជួយដីដែលបានកើតឡើងនៅម៉ោង ៤ និង ៤៨ នាទីព្រឹកថ្ងៃអង្គារនេះ មានជម្រៅរញ្ជួយ ៧៦ គីឡូម៉ែត្រ និងស្ថិតនៅចម្ងាយប្រហែល ១១៩ គីឡូម៉ែត្រភាគអាគ្នេយ៍នៃកោះ Sarangani ក្នុងទីក្រុង Sarangani ។

វិទ្យាស្ថានខាងលើបានបញ្ជាក់ទៀតថា គ្រោះរញ្ជួយដីនេះនឹងបង្កឲ្យមានការរំញ័រផ្សេងទៀត ប៉ុន្តែមិនបង្កការគំរាមកំហែងពីរលកយក្សស៊ូណាមិឡើយ ខណៈរហូតមកដល់ពេលនេះ ក៏មិនទាន់​មានសេចក្ដីរាយការណ៍អំពីជនរងគ្រោះ ឬក៏ការខូចខាតណាមួយនោះដែរ ។

គួរបញ្ជាក់ថា ហ្វីលីពីនតែងតែជួយគ្រោះរញ្ជួយដីជាញឹកញាប់ ដោយសារតែប្រទេសដីកោះមួយនេះស្ថិតនៅតាមបណ្ដាយខ្សែក្រវាត់ភ្នំភ្លើងប៉ាស៊ីហ្វិក ដែលលាតសន្ធឹងពីប្រទេសជប៉ុនឆ្លងកាត់តាមតំបន់អាស៊ីអាគ្នេយ៍ និងអាងប៉ាស៊ីហ្វិកផងដែរ ខណៈគ្រោះរញ្ជួយដីកម្រិត ៧.៦ រ៉ិចទ័រកាលពីខែធ្នូ ឆ្នាំ២០២៣ បានវាយប្រហារលើកោះ Mindanao ហើយថែមទាំងបានចេញការព្រមានពីរលកយក្សស៊ូណាមិរយៈពេលខ្លី និងបានសម្លាប់មនុស្ស ៣ នាក់ផងដែរ ៕

ប្រែសម្រួលដោយ ៖ ជីវ័ន្ត

ចុចអាន ៖ ហេតុអ្វីបានជាប៉ូលិសមិនទាន់បញ្ចេញឈ្មោះពេញជនដៃដល់ហក់ចាក់កញ្ចឹង ក មេបក្សប្រឆាំង កូរ៉េខាងត្បូង?