ក្រុមហ៊ុន៥នៅបារាំង បង្ហាញការចាប់អារម្មណ៍​ខ្លាំងវិនិយោគនៅកម្ពុជា

ក្រោយទទួលបានការអនុញ្ញាតឱ្យចូលជួបសម្តែងការគួរសមជាមួយសម្តេចនាយករដ្ឋមន្រ្តី ហ៊ុន ម៉ាណែត មានក្រុមហ៊ុនធំ​ៗ​ចំនួន៥នៅបារាំង បានបង្ហាញចំណាប់អារម្មណ៍យ៉ាងខ្លាំង ក្នុងការចាប់យកឱកាសវិនិយោគនៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនទាំងនោះមានដូចជា ក្រុមហ៊ុន TotalEnergies គ្រោងវិនិយោគលើវិស័យថាមពលកកើតឡើងវិញ, ក្រុមហ៊ុន Blue Circle បង្ហាញពីការចាប់អារម្មណ៍វិនិយោគលើថាមពលកកើតឡើងវិញ ជាពិសេសថាមពល​ដែលដើរដោយ​កម្លាំងខ្យល់, ក្រុមហ៊ុនអគ្គិសនីបារាំង (Électricité de France, EDF), ក្រុមហ៊ុន EDF វិនិយោគលើវិស័យ​ថាមពលកកើតឡើងវិញ និងក្រុមហ៊ុន Alstom វិនិយោគលើវិស័យដឹកជញ្ជូនផ្លូវដែក និងផលិតរថភ្លើងល្បឿនលឿន ជាដើម។

សម្តេច ហ៊ុន ម៉ាណែត នាយករដ្ឋមន្រ្តី បានស្វាគមន៍ និងសម្តែងក្តីរីករាយចំពោះការចាប់អារម្មណ៍របស់ក្រុម​ហ៊ុនបារាំង​ទាំងអស់នេះ។ សម្តេចធិបតីបានសង្កត់ធ្ងន់ថា កម្ពុជា មានច្បាប់វិនិយោគ និងបរិស្ថានដ៏ល្អប្រសើរសម្រាប់ការវិនិយោគ ជាពិសេសលើវិស័យបច្ចេកវិទ្យាថ្មី វិស័យថាមពលកកើតឡើងវិញ បចេ្ចកវិទ្យាឌីជីថល ហេដ្ឋារចនាសម្ព័ន្ធ និងវិស័យ​កសិកម្ម ជាដើមដែលផ្តល់ភាពងាយស្រួលដល់ក្រុមហ៊ុនទាំងនោះ។

ទន្ទឹមនេះ សម្តេច បានលើកទឹកចិត្តធុរកិច្ចបារាំងក្នុងការចាប់ផ្តើម និងពង្រីកប្រតិបត្តិការនៅកម្ពុជា ក្នុងវិស័យដែល​មានស្រាប់ និងវិស័យដែលអាចទាក់ទាញនវានុវត្តន៍ ការវិនិយោគ ដូចជា វិស័យកសិកម្ម, កែច្នៃម្ហូបអាហារ, អគ្គិសនី និងអេឡិចត្រូនិច, ការថែទាំសុខភាព, អប់រំ បច្ចេកវិទ្យាព័ត៌មាន ក៏ដូចជា វិស័យត្រួសត្រាយផ្លូវ ដែលអាចផ្តល់ផល​ប្រយោជន៍ដល់អ្នកចាប់ផ្តើមមុនគេ (first-mover advantage) ដូចជាវិស័យយានយន្ត,បរិវត្តកម្មឌីជីថល, បច្ចេកវិទ្យា​បៃតង ការស្រាវជ្រាវផ្នែកវេជ្ជសាស្ត្រ, និងឧស្សាហកម្មវប្បធម៌ និងច្នៃប្រឌិត ជាដើម។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានឱ្យដឹងថា ក្រុមហ៊ុននៅប្រទេសបារាំងចំនួន ៨០ក្រុមហ៊ុន នឹងមានឱកាសជួបសម្តេច ហ៊ុន ម៉ាណែត នៅក្នុងវេទិកាធុរកិច្ចនៅប្រទេសបារាំង។ បើតាមអ្នកឧកញ៉ា លឹម ហេង ជំនួបនេះ ក៏បានផ្តល់ឱកាសឱ្យកម្ពុជា បានផ្សព្វផ្សាយពីសក្តានុពល កាលានុវត្តភាព ទៅដល់ក្រុមហ៊ុនទាំងអស់នោះ ឱ្យមកវិនិយោគនៅកម្ពុជាផងដែរ។ បើនិយាយថា ឱ្យមកវិនិយោគនៅកម្ពុជា គឺទីផ្សារតូចណាស់ ប៉ុន្តែកម្ពុជា បានចូល​ជាសហគន៍សេដ្ឋកិច្ចអាស៊ាន ដូច្នេះមកវិនិយោគនៅកម្ពុជា ដូចជាវិនិយោគនៅទីផ្សារអាស៊ានទាំងមូលផងដែរ ដែលមានប្រជាជនប្រមាណជាង ៦៦០លាននាក់។ លើសពីនេះទៀត កម្ពុជា មានកិច្ចព្រមព្រៀងសេរី​ពាណិជ្ជកម្ម​កម្ពុជាចិន, កម្ពុជា កូរ៉ខាងត្បូង អេមីរ៉ាតអារ៉ាប់រួម ក៏ដូចជាកិច្ចព្រមព្រៀងគ្រប់ជ្រុងជ្រោយថ្នាក់តំបន់ អាសិប ជាដើម។ នេះជាការបន្ថែមរបស់អ្នកឧកញ៉ា លឹម ហេង។

ជាមួយគ្នានេះ ក៏មានការចុះអនុស្សរណៈយោគយល់គ្នាចំនួន៦ធំៗដូចជា ៖ ទី១/អនុស្សរណៈយោគយល់រវាង សភាពាណិជ្ជកម្មកម្ពុជា និងសម្ព័ន្ធនិយោជកហ្វ្រង់កូហ្វូន (APF)។  ទី២/អនុស្សរណៈយោគ​យល់រវាង​ក្រុម​ហ៊ុនរ៉ូយ៉ាល់គ្រុប និងក្រុមហ៊ុន Blue Circle។ ទី៣/អនុស្សរណៈយោគយល់រវាង អាកាសយានដ្ឋានអន្តរជាតិតេជោ (OCIC) និង ក្រុមហ៊ុន Lagardere Travel Retail។ ទី៤/អនុស្សរណៈយោគយល់រវាង ក្រុមហ៊ុន OCIC និង Aloest Productions។ ទី៥/អនុស្សរណៈយោគយល់រវាង ក្រុមហ៊ុន OCIC និង  Platform Impact (តំណាងដោយក្រុមហ៊ុន Ecole 42) និងទី៦-អនុស្សរណៈយោគយល់រវាង LYP គ្រុប និងក្រុមហ៊ុន SEMMARIS។

សូមបញ្ជាក់ថា សម្តេចធិបតី ហ៊ុន ម៉ាណែត បានបំពេញបេសកកម្មនៅតំបន់អឺរ៉ុបចាប់ពីថ្ងៃទី១៣ ដល់ថ្ងៃទី១៩ ខែមករា ឆ្នាំ២០២៤។ នៅក្នុងបេសកកម្មមួយសប្តាហ៍នៅតំបន់អឺរ៉ុបនេះ សម្តេចធិបតី នឹងចូលរួមកិច្ចប្រជុំប្រចាំឆ្នាំលើកទី៥៤ នៃវេទិកាសេដ្ឋកិច្ចពិភពលោក ក្រោមមូលបទ«ការកសាងឡើងវិញនូវទំនុកចិត្ត» នៅទីក្រុងដាវ៉ូស ប្រទេសស្វីស និងបំពេញទស្សនកិច្ចនៅប្រទេសបារាំងតបតាមការអញ្ជើញរបស់លោក អេម៉ានុយអែល ម៉ាក្រុង ប្រធានាធិបតី​បារាំង​ចាប់ពីថ្ងៃទី១៨ ដល់ថ្ងៃទី១៩ ខែមករា ឆ្នាំ២០២៤៕