ប្រឈមទោស​ជាប់​ខ្លួន អ្នក​រត់​តាក់ស៉ី ហ៊ាន​​លួច​​ដឹក​ពលករ​គេច​វេះ​ធ្វើ​ចត្តាឡីស័ក

លោក ងួន រតនៈ អភិបាល នៃគណៈអភិបាលខេត្តបាត់ដំបងបានធ្វើការព្រមានអ្នករត់តាក់ស៊ីទាំងអស់ កុំលួចលាក់ដឹកពលករគេចវេះពីមណ្ឌលចត្តាឡីស័ក ប្រសិនបើរកឃើញនឹងអនុវត្តតាមនីតិវិធីច្បាប់ ដោយមិនលើកលែងទ្បើយ។

មានប្រសាសន៍សំណេះសំណាលជាបងប្អូនអ្នករត់តាក់ស៊ី នៅច្រកអន្តរជាតិដូង ស្រុកកំរៀង ខេត្តបាត់ដំបងនៅថ្ងៃទី១៦ ខែកុម្ភៈ ឆ្នាំ២០២១ លោក ងួន រតនៈ បានមានប្រសាសន៍ថា «អ្នករត់តាក់ស៊ីទាំងអស់កុំលួចលាក់ដឹកពលករ ក្នុងគោលបំណងគេចវេះពីមណ្ឌលចត្តាឡីស័ក ប្រសិនបើសមត្ថកិច្ចរកឃើញនឹងផ្តន្ទាទោសដោយមិនលើកលែងឡើយ ពីបទជួញដូរមនុស្សខុសច្បាប់»។

ការដឹកជញ្ជូនពលករ ដើម្បីគេចវេះពីមណ្ឌលចត្តាឡីស័ក គឺជាហានិភ័យខ្ពស់មួយប្រសិនបើពលករនោះមានផ្ទុកជំងឺកូវីដ ១៩ នឹងមានការរីករាលដល់បងប្អូនក្រុមគ្រួសារ និងឈានទៅដល់ការផ្ទុះក្នុងសហគមន៍ណាមួយជាមិនខាន។

លោក ងួន រតនៈ ក៏ក្រើន​រំលឹក​ដល់​សមត្ថកិច្ចណាម្នាក់ហ៊ានដោះលែង អ្នកដឹកជញ្ជូនពលករ ដើម្បីគេចវេះពីមណ្ឌលចត្តាឡីស័ក ដោយចេតនាក្តី ឬដោយការសូកប៉ាន់ក្តី ត្រូវទទួលខុសត្រូវចំពោះមុខច្បាប់ដូចគ្នាដែរ៕

អត្ថបទ៖ សំអឿន