ប្រតិភូអន្ដរក្រសួង ចុះវាយតម្លៃបញ្ចប់សុពលភាពស្ថាបនាផ្លូវក្រាលកៅស៊ូ DBST ក្នុងស្រុកបាធាយ

ក្រុមការងារអន្ដរក្រសួងដឹកនាំដោយ លោក ផូ ផារិទ្ធ រដ្ឋលេខាធិការក្រសួងអភិវឌ្ឍន៍ជនបទ នៅព្រឹកថ្ងៃទី១២ ខែកុម្ភៈ ឆ្នាំ ២០២៤ នេះ បានចុះត្រួតពិនិត្យ និងវាយតំលៃបញ្ចប់សុពលភាព លើការងារស្ថាបនាផ្លូវ ក្រាលកៅស៊ូ DBST មួយខ្សែប្រវែង ២ ៣០០ម៉ែត្រ និងប្រព័ន្ធលូសងខាងផ្លូវសរុប ៨០០ម៉ែត្រ ស្ថិតក្នុងភូមិកំប៉ោល ឃុំសណ្តែក ទៅភូមិថ្កូវ ឃុំត្រប់ ស្រុកបាធាយ ខេត្តកំពង់ចាម ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងដំណើរចុះត្រួតពិនិត្យ និងវាយតម្លៃបញ្ចប់សុពលភាពលើការងារស្ថាបនាផ្លូវក្រាលកៅស៊ូ DBST មួយខ្សែនេះ លោក ផូ ផារិទ្ធ រដ្ឋលេខាធិការ បានបញ្ជាក់ថា ផ្លូវក្រាលកៅស៊ូនេះ គឺអនុវត្តន៍គម្រោងដោយនាយកដ្ឋានវិស្វកម្ម របស់ក្រសួងការពារជាតិ និងប្រើប្រាស់ថវិការបស់រាជរដ្ឋាភិបាលកម្ពុជា។ ទន្ទឹមគ្នានេះដែរ លោកបានអំពាវនាវឱ្យអាជ្ញាធរមូលដ្ឋាន និងប្រជាពលរដ្ឋចូលរួមថែរក្សាផ្លូវឱ្យបានល្អ ហាមដឹកជញ្ជូនទំនិញធន់ធ្ងន់លើសចំនួនកំណត់ជាហេតុធ្វើឱ្យផ្លូវងាយរងគ្រោះ។ លោកបានបន្ថែមទៀតថា រាជរដ្ឋាភិបាល តាមរយៈមន្ទីរអភិវឌ្ឍន៍ជនបទ នឹងបន្ដសាងសង់ផ្លូវជាច្រើនខ្សែទៀត នៅឆ្នាំ២០២៤ និងឆ្នាំបន្ដបន្ទាប់ទៀត សម្រាប់អាណត្ដិទី៧ ដែលដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី។

គួរឱ្យដឹងថា ការស្ថាបនាផ្លូវក្រាលកៅស៊ូ DBST មួយខ្សែនេះមានប្រវែង ២ ៣០០ម៉ែត្រ ទទឹង ៦ម៉ែត្រ ចិញ្ចើមផ្លូវសងខាងក្រាលដីល្បាយក្រួសកម្រាស់ ០,២ម៉ែត្រ និងកសាងប្រព័ន្ធលូបង្ហូរទឹកសងខាងផ្លូវសរុប ៨០០ម៉ែត្រ ស្ថិតក្នុងភូមិកំប៉ោល ឃុំសណ្តែក ទៅភូមិថ្កូវ ឃុំត្រប់ ស្រុកបាធាយ ខេត្តកំពង់ចាម៕

 អត្ថបទ និង រូបភាព ៖ ឡេក ចាន់ពេជ្រ