យុទ្ធនាការបាញ់សម្លាប់មូសខ្លា នៅក្នុងភូមិសាស្ត្ររាជធានីភ្នំពេញ

គិតត្រឹមថ្ងៃទី ២៨ ខែកុម្ភៈនេះ ក្រុមការងារនៃយុទ្ធនាការបាញ់សម្លាប់មូសខ្លា នៅក្នុងភូមិសាស្ត្ររាជធានីភ្នំពេញបានធ្វើសកម្មភាពបាញ់សម្លាប់មូសខ្លា បានចំនួន៩ខណ្ឌហើយ ដែលស្មើនិង៤២សង្កាត់ ហើយយុទ្ធនាការនេះគ្រោងនឹងបាញ់សម្លាប់មូសខ្លានៅទូទាំង១៤ខណ្ឌតែម្តង សំដៅធ្វើយ៉ាងណា លុបបំបាត់មូសខ្លា និងកាត់បន្ថយឲ្យបាននូវជំងឺគ្រុន ឈាម។ នេះបើតាមលោក ការឱ្យដឹងពីលោក ងី មានហេង ប្រធានមន្ទីរសុខាភិបាលរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួររំលឹកថា៖ អនុវត្តតាមការចង្អុលបង្ហាញពីសម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រី លើការយកចិត្តទុកដាក់សុខមាលភាពប្រជាពលរដ្ឋ និងដោយយោងទៅលើស្ថានភាពជាក់ស្ដែងនៃការរីករាលដាលជំងឺគ្រុនឈាមមានការកើនឡើង លោក ឃួង ស្រេង អភិបាលនៃគណៈអភិបាលរាជធានីភ្នំពេញ បានដឹកនាំប្រជុំជាមួយអាជ្ញាធរ និងមន្ត្រីជំនាញពាក់ព័ន្ធ ដើម្បីចាត់វិធានជាបន្ទាន់ ដោយចាត់ក្រុមការងារនៃមន្ទីរសុខាភិបាលរាជធានីភ្នំពេញ និងដោយមានកិច្ចសហការ ពីកងពលតូចលេខ៧០ ចុះបាញ់ថ្នាំមូសនៅសង្កាត់ទាំង១០៥ ទូទាំងរាជធានីភ្នំពេញសំដៅធ្វើយ៉ាងណាលុបបំបាត់ឱ្យអស់មូសខ្លា និងគ្មានជំងឺគ្រុនឈាម។

ក្រុមការងារនេះបានចាប់ផ្តើមអនុវត្តកាលពីល្ងាចថ្ងៃទី ២៣កុម្ភៈឆ្នាំ២០២៤ នៅខណ្ឌចំនួន៥ដែលជាខណ្ឌមានបញ្ហាប្រឈម ជំងឺគ្រុនឈាមខ្លាំងជាងគេ នោះគឺខណ្ឌដង្កោ ខណ្ឌកំបូល ខណ្ឌពោធិ៍សែនជ័យ ខណ្ឌសែនសុខ និង
ខណ្ឌមានជ័យ តែពេលនេះបានបន្តរហូតដល់៩ខណ្ឌស្មើនិង៤២សង្កាត់ហើយ៕

អត្ថបទ៖ ស្រីរ័ត្ន