ព័ត៌មានជាតិ

ប្រើបច្ចេកវិទ្យា Weigh Emotion ដោះស្រាយបញ្ហារុំារ៉ៃ រថយន្តដឹកលើសទម្ងន់កំណត់

បានផុស

២ years មុន

នៅ

ថ្ងៃពុធ ៦ មីនា ២០២៤

ដោយ

លោក ស៊ុន ចាន់ថុល ឧបនាយករដ្ឋមន្រ្តី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានគូសបញ្ជាក់ថា ដើម្បីអាចគ្រប់គ្រងបាននូវបញ្ហារថយន្តដឹកលើសទម្ងន់នៃច្បាប់កំណត់ ការប្រើប្រាស់ប្រព័ន្ធបច្ចេកវិទ្យា weigh emotion ជួយដោះស្រាយបញ្ហារុំារ៉ៃមួយនេះនិងកុំឲ្យផ្លូវឆាប់ខូចខាតតទៅទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបិទសន្និបាតបូកសរុបលទ្ធផលការងារក្រសួងសាធារណការនិងដឹកជញ្ជូនកាលពីពេលថ្មីៗនេះ លោក ស៊ុន ចាន់ថុល មានប្រសាសន៍ថា ការងារត្រួតពិនិត្យយានយន្តដឹកលើសកំណត់ គឺជាការងាររ៉ាំរ៉ៃមួយដែលត្រូវដោះស្រាយ ហើយបញ្ហានេះកើតមានឡើងតាំងពីលោកនៅកាន់ជារដ្ឋមន្រ្តី ហើយឈានមកដល់អាណត្តទី៧ ក៏នៅតែមានបន្តកើតមានឡើង ហើយក៏ជាការងាររសើបដែលមន្ត្រីពាក់ព័ន្ធទាំងអស់ត្រូវខិតខំធ្វើការបន្ថែមទៀត។

លោក ស៊ុន ចាន់ថុល បានគូសបញ្ជាក់ថា រាជរដ្ឋាភិបាលពិតជាមានផលពិបាកណាស់នៅក្នុងការស្វែងរកថវិកាដើម្បីយកមកសាងសង់ផ្លូវ ដូច្នេះបើដឹកលើសទម្ងន់កំណត់នៃច្បាប់ នោះនឹងធ្វើឲ្យផ្លូវឆាប់ខូចសឹករិចរិល។

ជាក់ស្ដែង ក្រសួងបានឯកភាពថា លើសកម្រិតពី ៤០តោន ទៅ៤៥តោន ប៉ុន្តែនៅតែមានការដឹកលើសទម្ងន់ដែលឈានដល់ ៥០-៦០តោន ដោយក្រុមការងារធ្លាប់ចាប់បានរួចមកហើយនូវរថយន្តដែលដឹកលើសដល់ ៣០ តោន មិនមែនដឹកលើសត្រឹម ៥ តោននោះទេ។

បើតាមលោកឧបនាយករដ្ឋមន្រ្តី សម្រាប់ផ្លូវនីមួយៗ ក្រសួងសុទ្ធសឹងតែមានរូបមន្តច្បាស់លាស់ដើម្បីគណនាពីទម្ងន់កំណត់ និងលើរថយន្តដឹកទំនិញលើសទម្ងន់នៃច្បាប់ ដែលរថយន្តបានបើកនៅលើផ្លូវជាតិ និងផ្លូវខេត្តនានា។

លោក ស៊ុន ចាន់ថុល សង្កត់ធ្ងន់ថា «ក្រសួងខំរកថវិកាមកសាងសង់ផ្លូវ ហើយពេលសាងសង់ផ្លូវថា ផ្លូវអាចជាប់ដល់ ៦ឆ្នាំ ដល់ ១០ឆ្នាំ ដោយអាចគណនាទុកមុនថានឹងមានរថយន្តបើកលើផ្លូវដែលសាងសង់រួចនោះ ៥០លានគ្រឿងក្នុងមួយឆ្នាំ ប៉ុន្តែប្រសិនបើមួយថ្ងៃមានរថយន្តដឹកលើសទម្ងន់ដល់ ៣០តោន ដូច្នេះ ១ឆ្នាំវាស្មើនឹងជាង ១លានគ្រឿងបាត់ទៅហើយ ដូច្នេះបើដឹកលើសទម្ងន់បែបហ្នឹង តើឲ្យផ្លូវដែលយើងបានសាងសង់ឡើងជាប់បានយូរដោយរបៀបណា ហើយនៅពេលផ្លូវឆាប់ខូច គឺមកបន្ទោសថាក្រសួងសាធារណការធ្វើផ្លូវមិនកើត មិនជាប់»។

ត្រង់ចំណុចនេះ លោកបានពន្យល់ថា «មុនធ្វើផ្លូវនីមួយៗក្រសួងបានសិក្សាយ៉ាងច្បាស់មុនចាប់ផ្ដើមសាងសង់ គឺក្រសួងធ្វើផ្លូវជាប់រហូត ប៉ុន្តែផ្លូវឆាប់ខូចខាតមិនមែនបណ្ដាលមកពីកត្តាក្រសួងនោះទេ គឺមកពីកត្តាអ្នកដឹកទំនិញដែលដឹកលើសទម្ងន់កំណត់ដោយច្បាប់បានកំណត់ទៅវិញទេ»។

លោកសង្ឃឹមថា រដ្ឋមន្ត្រីអាណត្តិថ្មី និងអាចដោះស្រាយបញ្ហានេះបាន ហើយលោកក៏សប្បាយចិត្តនៅពេលរដ្ឋមន្ត្រី ប៉េង ពោធិ៍នា ដាក់ចេញនូវនីតិវិធីក្នុងការពង្រឹងការគ្រប់គ្រង និងប្រើប្រាស់បច្ចេកវិទ្យាទំនើប weigh emotion ដើម្បីទប់ស្កាត់ការដឹកទំនិញលើសទម្ងន់នៃច្បាប់ ឲ្យបានប្រសើរឡើងថែមទៀ៕