ជីវិតកម្សាន្ដ

ជុំ លីណូ បំផុសចូលរួមផ្សព្វផ្សាយអ្វីដែលខ្មែរមាន ព្រោះជាប្រទេសអច្ឆរិយ ដ៏អស្ចារ្យជាងគេលើលោក

បានផុស

២ years មុន

នៅ

ថ្ងៃសៅរ៍ ២៣ មីនា ២០២៤

ដោយ

តារាចម្រៀងល្បីឈ្មោះលោក ជុំ លីណូ បានចេញមុខអំពាវនាវមហាជន និងបំផុសស្មារតីដល់កូនខ្មែរគ្រប់រូប ត្រូវមានមោទនភាព ដោយចូលរួមផ្សព្វផ្សាយអ្វីដែលខ្មែរមាន ព្រោះខ្មែរជាប្រទេសអច្ឆរិយដ៏អស្ចារ្យជាងគេលើលោក។

ការអំពាវនាវរបស់តារាចម្រៀងលោក ជុំ លីណូ នេះ ស្របពេលកំពុងផ្ទុះការចាប់អារម្មណ៍កក្រើក នៃព្រឹត្តិការណ៍សមរាត្រី (Equinox) ដ៏អស្ចារ្យ ដែលព្រះអាទិត្យរះចំកំពូលកណ្ដាល នៃប្រាសាទអង្គរវត្ត នៅទឹកដីខេត្តសៀមរាប។ ព្រឹត្តិការណ៍សមរាត្រីនេះ គេឃើញមានភ្ញៀវទេសចរជាតិ និងអន្តរជាតិយ៉ាងច្រើនកុះករ បាននាំគ្នាសម្រុកទៅទស្សនា និងថតផ្ដិតយករូបភាព ដោយភាពសប្បាយរីករាយនូវទិដ្ឋភាពដ៏អស្ចារ្យនេះ។

លោក ជុំ លីណូ បានបង្ហោះរូបភាពភ្ជាប់ជាមួយនឹងខ្លឹមសារថា «យើងជាខ្មែរ សូមជួយផ្សព្វផ្សាយ អ្វីដែលខ្មែរមាន ដែលប្រទេសផ្សេងៗ លើពិភពលោកមិនដែលមាន និងមិនអាចមានដូចយើង បើស្រលាញ់ជួយស៊ែរម្នាក់ ១ ផងណា(ខ្មែរអស្ចារ្យជាងគេលើលោក)»។ លោកបន្តថា «អ្នកវិទ្យាសាស្ត្រ ក៏មិនងាយស្រាវជ្រាវយល់ពីបុរាណវិទ្យារបស់ខ្មែរយើងដែរ កុំច្រឡំឲ្យសោះ(ខ្មែរជាប្រទេសអច្ឆរិយណា)»។

គេកត់សម្គាល់ថា តារាចម្រៀងចូលចិត្តស្តាយ៍បែបយុវវ័យលោក ជុំ លីណូ សម្រាប់អាជីពសិល្បៈបច្ចុប្បន្ននៅតែរក្សាបានការគាំទ្រ និងមានប្រជាប្រិយភាពដូចដើម ខណៈកន្លងមក លោក ក៏ជ្រែកខ្លួនចាប់មុខជំនួញជាច្រើនទៀតផងដែរ។ មិនត្រឹមតែជោគជ័យលើមុខជំនួញផ្សេងៗ និងអាជីពសិល្បៈប៉ុណ្ណោះទេ លោក លីណូ ថ្មីៗ នេះ ធ្លាយដំណឹងថា លោកបានបោះទុនរាប់ម៉ឺនដុល្លារ ដើម្បីក្លាយជាម្ចាស់ភាគហ៊ុនមួយទៀតផង៕

អត្ថបទ ៖ ចាន់រ៉ា