សម្ដេច ហ៊ុន សែន ជាប់ជាប្រធានព្រឹទ្ធសភា ដោយសំឡេងគាំទ្រទាំងស្រុង ៦២លើ៦២

អតីតនាយករដ្ឋមន្ត្រី សម្ដេចតេជោ ហ៊ុន សែន ត្រូវបានអង្គព្រឹទ្ធសភាបោះឆ្នោតជ្រើសរើសជាប្រធានព្រឹទ្ធសភាជាផ្លូវការហើយ សម្រាប់នីតិកាលទី៥នេះ ដោយសំឡេងគាំទ្រពីអង្គព្រឹទ្ធសភាទាំងស្រុង ៦២លើ៦២សំឡេង។

ដូចការគ្រោង ព្រឹទ្ធសភា នីតិកាលទី៥ បានបើកកិច្ចប្រជុំដំបូងរបស់ខ្លួន នៅព្រឹកថ្ងៃទី០៣ ខែមេសា ឆ្នាំ២០២៤ ក្រោមព្រះរាជាធិបតីភាពរបស់ព្រះមហាក្សត្រកម្ពុជា ព្រះករុណា ព្រះបាទ សម្តេចព្រះ នរោត្តម សីហមុនី។ ក្រោយការប្រកាស បើកកិច្ចប្រជុំដំបូង ក្រោមព្រះរាជាធិបតីភាពព្រះមហាក្សត្រ ព្រឹទ្ធសភា បានបន្តសម័យប្រជុំដំបូងរបស់ខ្លួន ដែលដឹកនាំដោយប្រធានបណ្ដោះអាសន្នមួយរូប គឺលោក សុខ ឥសាន ដែលមានវ័យច្រើនជាងគេ ដើម្បីបោះឆ្នោតជ្រើសរើសនូវសមាសភាពក្បាលម៉ាស៊ីនព្រឹទ្ធសភា។

ជាលទ្ធផល អង្គព្រឹទ្ធសភា ដែលវត្តមានសមាជិក សមាជិកាសរុប ៦២រូប បានបោះឆ្នោតជ្រើសរើសអតីតនាយករដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជា សម្ដេចតេជោ ហ៊ុន សែន ជាប្រធានព្រឹទ្ធសភា ក្នុងសំឡេងសរុបទាំង ៦២សំឡេង។

សម្ដេចតេជោ ជាឥស្សរជនទី៣ដែលត្រូវបានជ្រើសរើសឱ្យកាន់តំណែងជាប្រធានព្រឹទ្ធសភា បន្ទាប់ពីប្រធានព្រឹទ្ធសភាដំបូង គឺសម្ដេច ជា ស៊ីម និងក្រោយមក គឺសម្ដេច សាយ ឈុំ៕