ភ្លើងឆេះព្រៃរបោះ និងចម្ការស្វាយជាង៣០ហិកតា នៅបាត់ដំបង

ចម្ការស្វាយទំហំប្រមាណ ៨០ហិកតា ត្រូវបានអណ្ដាតភ្លើងឆាបឆេះ និងរោលរាលអស់ប្រហែល៤០% ស្មើនឹងជាង៣០ ហិកតា ដែលបច្ចុប្បន្នសមត្ថកិច្ចកំពុងស្រាវជ្រាវរកមូលហេតុនៅឡើយ។

យោងតាមរបាយការណ៍របស់សមត្ថកិច្ចបានបញ្ជាក់ថា អគ្គិភ័យដែលឆាបឆេះយ៉ាងសន្ធោសន្ធៅទៅលើព្រៃរបោះ និងដំណាំស្វាយនោះបានកើតឡើងកាលពីថ្ងៃទី៨ ខែមេសា ឆ្នាំ២០២៤ វេលាម៉ោង៤និង៤៥នាទីល្ងាច ស្ថិតនៅចំណុចស្រែព្រីង ក្នុងភូមិធ្ង័រ ឃុំចែងមានជ័យ ស្រុកបាណន់ ខេត្តបាត់ដំបង បង្កការភ្ញាក់ផ្អើលយ៉ាងខ្លាំងពីសំណាក់ប្រជាពលរដ្ឋដែលរស់នៅក្នុងតំបន់នោះ។

ចម្ការស្វាយខាងលើនេះជារបស់ឈ្មោះ ឡុង  សយសុធី ភេទប្រុស រស់នៅក្រុងបាត់ដំបង មានទំហំប្រមាណ៨០ហិកតា ឆេះអស់ប្រហែល៤០% ដោយសមត្ថកិច្ចខេត្តបានចេញរថយន្តពន្លត់អគ្គិភ័យចំនួន២គ្រឿង រថយន្តស្រុកបាណន់១គ្រឿង និងរថយន្តស្រុករតន:មណ្ឌល១គ្រឿង ប៉ុន្តែពេលទៅដល់បានដើរមើលស្ថានភាពផ្លូវមានព្រៃស្តុក ផ្លូវចង្អៀត មិនអាចចូលបាន ហេតុនេះទើបមិនបានប្រើប្រាស់ទឹកទេ ប៉ុន្តែសមត្ថកិច្ច និងអាជ្ញាធរបានរកត្រាក់ទ័រមកឈូសទប់ស្កាត់កុំអោយភ្លើងឆេះរាលបន្តទៅទៀត ដោយប្រតិបត្តិការនេះត្រូវបានបញ្ចប់នៅវេលាម៉ោង៨និង៣០នាទីយប់។ ឯមូលហេតុមិនច្បាស់លាស់រង់ចាំស្រាវជ្រាវបន្ត៕

អត្ថបទ៖ សោ និយមរ័ត្ន